भांगरभूंय | प्रतिनिधी
कंसेंट टु इस्टाब्लीश खातीर प्रदुशण नियंत्रण मंडळा कडेन आजून अर्ज ना
पणजी, प्रतिनिधी : लोकांचो विरोध आशिल्ल्या नावशीच्या प्रस्तावित मरिना प्रकल्पाचेर सरकारान आजून कसलोच निर्णय घेवंक ना. प्रदुशण नियंत्रण मंडळा कडेन सुद्दा कंसेंट टु इस्टाब्लिश खातीर आजून मेरेन अर्ज येवंक ना, अशी म्हायती लेखी जापेंतल्यान मेळ्ळ्या. आमदार विरेश बोरकार हांच्या प्रस्नाक पर्यावरण मंत्री आलेक्स सिक्वेरा हांणी ही लेखी जाप दिल्या.
मेसर्स खरगवाल कन्स्ट्रक्शन प्रायव्हेट लिमिटेड हांचो नावशी हांगा मरिना प्रकल्प स्थापन करपाचो प्रस्ताव आसा. ह्या प्रस्तावाचेर गोंय दर्यादेग वेवस्थापन प्राधिकरणा कडल्यान आजून मेरेन निर्णय जावंक ना.
खरगवाल कन्स्ट्रक्शनान भौशिक सुनावणी घेवपा खातीर २०१७ वर्सा अर्ज केल्लो. ह्या अर्जाक अनुसरून २६ जुलय २०२० हे दिसा भौशिक सुनावणी निश्चित केली. ही भौशिक सुनावणी फुडें धुकलपाचो निर्णय जालो. दर्यादेग वेवस्थापन आराखडो निश्चित जाले उपरांत भौशिक सुनावणी घेवप शक्य जातलें, अशें जिल्होधिकाऱ्यांनी कळयले. जिल्होधिकाऱ्यांच्या आदेशाक खरगवाल कन्स्ट्रक्शनान खंडपीठात आव्हान दिले. सुनावणी घेवन खंडपीठान ५ एप्रिल २०२२ दिसा खरगवाल कन्स्ट्रक्शनाची याचिका भायरायली. दर्यादेग वेवस्थापन आराखड्याक मान्यताय मेळ्ळे उपरांत खरगवाल कन्स्ट्रक्शनान भौशिक सुनावणी घेवपा खातीर प्रदुशण नियंत्रण मंडळा कडेन परतून अर्ज केलो. १९ जुलय २०२३ दिसा हो अर्ज केलो.
हो प्रकल्प पर्यावरण मुल्यांकन अधिसुचोवणी २००६ खाला ये ना. तज्ज्ञ समितीच्या बसकेत असो निर्णय जाला. हाका लागून भौशिक सुनावणी घेवपाची आवश्यकता ना, अशें पत्र खरगवाल कन्स्ट्रक्शन कंपनीन प्रदुशण नियंत्रण मंडळाक धाडला. तरी प्रकल्पाक हेर घटनात्मक संस्थांच्या परवान्यांची गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
