भांगरभूंय | प्रतिनिधी
पणजीः राज्य कर्मचारी भरती आयोगान 36 प्रशिक्षीत इंग्लीश शिक्षक पदां खातीर घेतिल्ले दुसरे कॉम्प्युटरबेस परिक्षेचो (सीबीटी) निकाल जाहीर जाला. हे परिक्षेचो निमाणो निकाल फुडल्या आठ दिसांनी येतलो. आदल्या उमेदवारांकय नेमणूक पत्रां दिवपाक सुरवात केल्या अशें आयोगाच्या सूत्रांनी सांगलें.
प्रशिक्षीत इंग्लीश शिक्षकांच्या पदां खातीर आयोगान घेतिल्ले पयलें ‘सीबीटी’ परिक्षेत 942 विद्यार्थी पास जाले. पास जाल्ल्या उमेदवारां खातीर आयोगान काल (आयतारा) दुसरी परिक्षा आयोजीत केल्ली. त्या परिक्षेचोय निकाल जाहीर जाला, आनी निमाणो निकाल आठ दिसांनी येतलो.
सरकारी मुळाव्या शाळांनी प्रशिक्षीत इंग्लीश शिक्षकांचो उणाव आशिल्लो. हाचेर मात करपा खातीर कर्मचारी भरती आयोगान 36 पदां खातीर परिक्षा घेतली. हे परिक्षेक राज्यभरांतल्यान बरो प्रतिसाद मेळ्ळो. परिक्षे खातीर 1540 अर्ज आयिल्ल्यान आयोगान दोन टप्प्यांनी ही परिक्षा घेतली.
मजगतीं, राज्य सरकारान सरकारी नोकरेची पदां भरपा खातीर स्थापन केल्ल्या कर्मचारी भरती आयोगान डिसेंबर 2023 सावन वेगवेगळ्या खात्यांतल्या रिकाम्या पदां खातीर परिक्षा घेवपाक सुरवात केल्या. फाटल्या सात म्हयन्यांत सरकारी खात्यांतल्या जायत्या रिक्त पदां खातीर आयोगान परिक्षा घेतल्या आनी कांय वरां भितर निकालय जाहीर केल्यात. पूण लोकसभा वेंचणुकेचे आचारसंहिते खातीर पात्र थारिल्ल्यांक नेमणुकेचीं पत्रां दिवंक मेळ्ळीं नात. आचारसंहिता सोंपल्या उपरांत खात्यांनी रोखडीच पात्र उमेदवारांक नेमणूक पत्रां जारी करपाक सुरवात केली. आतां मेरेन जायत्या जाणांक नेमणूक पत्रां मेळ्ळ्यात अशेंय सूत्रांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
