प्रशासनांत कोंकणीचो वापर विशयाचेर 29 वेर कार्यशाळा

भांगरभूंय | प्रतिनिधी

भांगरभूंय । खबरां मेज
पणजी : युवा पणजी आनी राजभाशा संचालनालय, गोंय सरकार, ‘प्रशासनांत कोंकणी भाशेचो वापर’ ह्या विशयाचेर एका दिसाची कार्यशाळा घडोवन हाडटा.
युवा पणजीन गोंय सरकाराच्या राजभाशा संचालनालयाच्या जोड पालवान 29 नोव्हेंबर ह्या दिसा, एका दिसाची कार्यशाळा घडोवन हाडल्या. ती सरकारी कर्मचारी, शिक्षक, विद्यार्थी आनी नागरिका खातीर उक्ती आसा. सरकारी आनी प्रशासकी कामकाजांत मायभास कोंकणी वापरपाचें म्हत्व पटोवन दिवप. तशेंच राजभाशा अधिनेमा विशीं माहिती आनी कोंकणी भाशेचो वापर केल्यार पत्रवेव्हार प्रभावी कसो जावं येता हाचें म्हत्व पटोवपाचेर हे कार्यशाळेंत भर दितले.
ही कार्यशाळा प्रशासकीय कर्मचाऱ्यां खातीर चड उपेगी थारतली. संवादात्मक सत्रां वरवीं कोंकणी वापरल्यार प्रशासकी प्रक्रिया कशी सुगम करूं येता, संवाद सुदारूं येता, आनी गोंयकार समाजा कडेन घट संबंद कसो वाडोवंक मेळटा हाची जाणविकाय वांटेकारांक मेळटली.

कार्यावळीचो तपशील:
तारीख: शुक्रार, 29 नोव्हेंबर
वेळ: सकाळीं 9:30 ते सांजे 5 मेरेन
सुवात: मल्टीपर्पज हॉल, संस्कृती भवन, कला आनी संस्कृती संचालनालय, पाटो, पणजी.
अदीक माहिती खातीर वा नोंदणी करपा खातीर सनथ भरणे हांचे कडेन 9881887563 ह्या नंबराचेर संपर्क सादचो.
ऑनलायन नोंदणी: https://forms.gle/yBxaHNyQUwXT4Vfq9
ही कार्यशाळा प्रशासनांत कोंकणीची भुमिका घटमूट करपाचे दिकेन तशेंच गोंयांत सांस्कृतीक संरक्षण आनी प्रशासकीय कामकाज आनीक प्रभावी आनी परिणामकारक करपा खातीर एक म्हत्वाचें पावल जावन आसा. तेन्ना सगल्यांनी हे कार्यशाळेंत वांटेकार जावचें, असो उलो आयोजकांनी मारला.