प्रशासकां प्रमाण मुख्याधिकारी चलयतात पालिकेचो कारभार

भांगरभूंय | प्रतिनिधी

म्हापशें पालिका मंडळाच्या निर्णया बगर जीएसटी, टीसीएस सोपो, पे पार्कींग करांत वाड

म्हापशें: हांगासरल्या टॅक्सी स्टॅण्ड आनी मार्केटांतलें पे पार्किंगेच्या शुल्का सयत पालिका अधिकाऱ्यांनी मार्केटाच्या सोपो करांतूय मोटी वाड केल्या. ही वाड करतनाच विक्रेत्यांच्या कोयर करा सयत जीएसटी आनी टीसीएस करूय लागू केला.

पालिका मंडळाच्या थारावा विणें पालिका मुख्याधिकाऱ्यांनी शुल्क वाड आनी जीएसटी आनी टीसीएस कर लागू केला आसून वेंचणूक आचारसंहितेचो लाव घेवन पालिका मंडळ आनी आमदारांक काळखांत दवरून मुख्याधिकारी चंद्रकांत शेटकार हे एखाद्या प्रशासकां प्रमाण म्हापशें पालिकेचो कारभार बेकायदोपणान हाताळटात आनी हे पालिकेचेर पालिका मंडळ कार्यरत आसा काय ना असो प्रस्न सत्ताधारी गटांतल्या नगरसेवकांनी उक्तायला.

फाटल्या 30 जून 2023 दिसा तेन्नाच्यो नगराध्यक्षा प्रिया मिशाळ हांचे अध्यक्षताये खाला जाल्ल्या पालिका मंडळाचे बसकेंत मार्केट आनी टॅक्सी स्टॅण्डा वेले पे-पार्कींग शुल्कांत वाड केल्ली. ते प्रमाण दुचाकी खातीर दोन वरां खातीर 10 रुपया, जाल्यार चारचाकीक दोन वरां खातीर 20 रुपया असो दर निश्चीत केल्लो. पयलीं हो दर 5 आनी 10 रुपया आशिल्लो. तशेंच पे पार्किंगेची निविदा 1 कोटी रुपया काडपाचो निर्णय लेगीत जाल्लो.

ताचे पयलीं मार्केट सोपो करा खातीर दर निश्चीत केल्लो. शेडींतल्या विक्रेत्यांक प्रती चौरस मिटर 40 रुपया, जाल्यार शेडी भायल्या विक्रेत्यांक 25 रुपया प्रती चौखण मिटर दर आसतलो. हातूंत पांच रुपया कोयर कराचोय आस्पाव आसतलो. असो थाराव घेवन सोपो कंत्राटाची बोली निविदा 2 कोटी 42 लाख 24 हजार रुपया काडपाचो निर्णय घेतिल्लो.

पूण ह्या निविदांक कोणूच बोलिदार सांपडले नात. ताका लागून 30 जून 2023 दिसा जाल्ल्या पालिका मंडळाचे बकसेंत सुदारीत थारावा प्रमाण मार्केट सोपोची बोली 2.40 कोटी वेल्यान 1.86 कोटी रुपया जाल्यार पे पार्किंगेची बोली 80 लाखां वेल्यान 72 लाख रुपया केल्ली. तशेंच शेडी भायर 20 रुपया आनी शेडी भितर 30 रुपया असो नवो सोपो दर थारलो. हो दर पयलीं 25 रुपया आनी 40 रुपया आशिल्लो.

उपरांतूय बोलिदार सांपडूंक नाशिल्ल्यान फाटल्या 6 सप्टेंबर 2023 दिसा जाल्ले पालिका मंडळाचे बसकेंत अजून सोपो करांत 10 टक्के कपात केली. 1.86 कोटी वेल्यान 1.67 कोटी रुपयांची नवी निविदा काडपाचो थाराव घेतिल्लो. तरी लेगीत कोणूच बोलिदार पालिकेक सांपडलो ना. ताका लागून फाटल्या अर्थीक वर्सांत पालिकेन स्वताच्या कर्मचाऱ्यां वतिनूच सोपो कराची वसुली केली.

फाटल्या वर्सा प्रमाणूच अंदूंय पालिके कडल्यान सोपो आनी पे पार्किंगेची निविदा जारी करपाक वेळ काडपाचें धोरण आपणायलें. लोकसभा वेंचणूक आचारसंहितेच्या काळांत अदमासपत्रक मंजूर केलें. तशेंच सोपो कर शुल्क आनी पे पार्कींग दरांत वाड वा ह्या करांत जीएसटी वा टीसीएस कर लागू करपाचो थाराव अजून पालिका मंडळान घेतिल्लो ना.

मजगतीं, मुख्याधिकाऱ्यांनी आदेश जारी करून सोपो आनी पे पार्कींग शुल्कांत 18 टक्के जीएसटी आनी 2 टक्के टीसीएस सयत भायले भायर वाड केल्या. ह्या दरा प्रमाण शेडींतल्या विक्रेत्यांक प्रती चौरस मिटर 35 रुपया जाल्यार शेडी भायल्याक 25 रुपया, तशेंच कोयर कर 5 रुपया आनी तातूंत 18 टक्के जीएसटी आनी 2 टक्के टीसीएस लागू करतात. ते प्रमाण शेडींतल्या विक्रेत्यां कडल्यान प्रती चौरस मिटर 50 रुपया जाल्यार शेडी भायल्यांक 40 रुपया सोपो वसूल करतात. जाल्यार पे पार्किंगेंत टॅक्सी स्टॅण्डा वेलें शुल्क 50 रुपया आनी 18 टक्के जीएसटी आनी 2 टक्के टीसीएस मेळून 60 रुपया. जाल्यार मार्केट वाठारांतले हेर सुवातांनी दुचाकी खातीर 10 रुपया आनी वयल्या करा सयत 12 रुपया जाल्यार चार चाकीं खातीर 20 रुपया आनी वयले कर मेळून 24 रुपया शुल्क वसूल करतात.

पालिका मुख्याधिकारी चंद्रकांत शेटकार हांणी वेंचणूक आचार संहितेचो आदार घेत आनी पालिका मंडळाक काळखांत दवरून भायले भायर सोपो आनी पे पार्कींग करात सुमारा भायर वाड करतनाच तातूंत जीएसटी आनी टीसीएस कराचो तातूंत आस्पाव केला.

पालिका मंडळान मार्केटांतलो सोपो तशेंच टॅक्सी स्टॅण्डा सयत अधिसुचीत केल्ल्या पे पार्कींग सुवातां वेलो दर वयल्या थारावा वरवीं निश्चीत केल्लो. विक्रेत्यां कडल्यान सोपो कर हो कोयर करा सयत शेडींतल्या 30 आनी शेडी भायले 20 असो थारिल्लो. जाल्यार टॅक्सी स्टॅण्डा सयत मार्केट आनी पालिका वाठारांतल्या हेर अधिसुचीत पे पार्कींग थळांचो दर दुचाकीं खातीर 10 जाल्यार चार चाकी खातीर 20 रुपया आशिल्लो.