प्रधानमंत्री राष्ट्रीय बाल पुरस्कारा खातीर अर्ज मागयल्यात

भांगरभूंय | प्रतिनिधी

पणजीः भुरग्यांच्या विविध क्षेत्रांतल्या असामान्य कर्तृत्वाची दखल घेवपा खातीर भारत सरकारा वतीन “प्रधानमंत्री राष्ट्रीय बाल पुरस्कार” हो म्हत्वाचो राष्ट्रीय पुरस्कार भेटयतात. गुणवान तरणाट्या भुरग्यांचो सन्मान करपा खातीर सुरू केल्लो हो पुरस्कार शौर्य, खेळां, समाज सेवा, विज्ञान आनी तंत्रज्ञान, पर्यावरण, कला आनी संस्कृती अशां स वर्गांत दितात. नवी दिल्लींत विशेश सुवाळ्यांत भारताच्या राष्ट्रपती हस्तुकीं हे पुरस्कार भेटयतात.
5 वर्सा परस चड पिरायेची आनी 18 वर्सा पिराये सकयली (31 जुलय 2026 मेरेन), खंयचीय भुरगीं, जी भारतीय नागरीक आसात आनी भारतात रावता, ती ह्या पुरस्कारा खातीर पात्र आसात. तशेंच कार्य/घडणूक/कर्तृत्व अर्ज/शिफारसीच्या निमण्या तारखे मेरेनच्या 2 वर्सांच्या काळा भितरले आसपाक जाय. अर्जदाराक हे पयली ह्या पुरस्कारांच्या खंयच्याय वर्गांत पुरस्कार फावो जाल्लो आसपाक फावना.
प्रधानमंत्री राष्ट्रीय बाल पुरस्कारा खातीर खंयचीय व्यक्ती वा संस्था असामान्य कर्तृत्वान भुरग्याची शिफारस करपाक शकता. तशेंच भुरगे लेगीत स्वताच्या शिफारसी वरवीं अर्ज करपाक शकता. तशेंच केंद्रीय मंत्री (कॅबीनेट मंत्री/राज्यमंत्री (स्वतंत्र प्रभार आशिल्लें )/राज्यमंत्री), सगळीं राज्यां/संघप्रदेशांचे मुख्यमंत्री/राज्यपाल/नायब राज्यपाल/प्रशासक, खासदार, केंद्र सरकारची मंत्रालयां/विभाग, राज्यां/संघप्रदेशांचे सरकारी विभाग, राज्यां/संघप्रदेशांच्या बायलां आनी भुरगीं उदरगत /समाज कल्याण खात्यांचे प्रधान सचीव, जिल्होधिकारी, केंद्रीय विद्यालय संघठण/नवोदय विद्यालय समिती खालच्यो शिक्षणीक संस्थां/शाळां कडल्यानय शिफारसी मागयल्यात.
शिफारसी निश्चीत करतना शिफारस केल्ले भुरगे राष्ट्रीय पांवड्यावयल्या पुरस्कारा खातीर असामान्य तरेन पात्र आसा, ताचे कर्तृत्व समाज सेवेक लागू जाता, अशां गजाली सयत कर्तृत्वान चली भुरगे, दुबळे घटक, एससी/एसटी समाज आनी दिव्यांग भुरग्यांचो विचार जातलो.
ऑनलायन अर्ज/नामांकनां/शिफारसी स्विकारपाची निमाणी तारीख 31 जुलय 2026 आसा. अदीक म्हायती खातीर राष्ट्रीय पुरस्कार पोर्टलाक (https://awards.gov.in) भेट दिवची.
गोंयच्या राज्यपाला वरवीं आपले नामांकन धाडपाक इत्सुक आशिल्ल्या पात्र उमेदवारांनी आपली सविस्तर म्हायती, दाखले आनी कर्तृत्वाच्या म्हायतीची हार्ड कॉपी बायलां आनी भुरगीं उदरगत संचालनालय, 2 रो माळो, शिक्षण खात्याची पोरणी इमारत, 18 जून मार्ग, पणजी-गोंय ह्या नाम्याचेर 4 जुलय 2026 मेरेन सुपूर्द करची, उपरांत अशें अर्ज लोकभवनाक धाडटले.