भांगरभूंय | प्रतिनिधी
वास्को, प्रतिनिधी: प्रधानमंत्री नरेंद्र मोदी हांची वास्को सभा जाले उपरांत गोंयच्या दोनूय जाग्यांचेर खूब व्हडलो परिणाम जातलो. भाजपाच्या दोनूय जाग्यां वयलीं मतां वाडटलीं हाची ‘गॅरंटी’ आशिल्ल्याचें मुख्यमंत्री डॉ. प्रमोद सावंत हांणी सांगलें. हे सभेक ५० हजारां वयर लोक हाजीर रावतले, अशेंय तांणी सांगलें.
शेनवारा सांजवेळार ५ वरांचेर झुआरीनगर- सांकवाळ मार्गार बिट्स पिलानी फुडल्या मैदानाचेर मोदी हांची जाहीर सभा जातली. तिची तयारी कशी चल्ल्या हाचो नियाळ घेवपाक मुख्यमंत्री डॉ. सावंत हांणी पळोवणी केली. ह्या वेळार तांचे वांगडा पंचायत मंत्री मॉवीन गुदिन्हो, मुरगांवचे आमदार संकल्प आमोणकार, कुठ्ठाळीचे आमदार आंतोन वास, आदले राज्यसभा खासदार अॅड. नरेंद्र सावयकार, जयंत जाधव, चिखलेचे सरपंच कमलाप्रसाद यादव तशेंच हेर पदाधिकारी, कार्यकर्ते, सरकारी अधिकारी हाजीर आशिल्ले.
लोकां मदीं मोदी हांकां पळोवपाची, तांकां आयकुपाची उमळशीक आशिल्ल्यान लोक व्हडा प्रमाणांत सभेक हाजीर रावतले. मोदी हांची ‘गॅरंटी’ आशिल्ल्यान हे सभे उपरांत आमच्या उमेदवारांचीं मतां बरींच वाडटलीं. मुरगांव म्हालांत ही सभा आशिल्ल्यान हांगाच्या चारूय मतदारसंघांतल्यान चडांत चड लोक सभेक येतले, हे खातीर चारूय आमदार यत्न करतात अशें मुख्यमंत्र्यान म्हणलें.
मॉवीन गुदिन्हो हांणी हे बसकेक लोक व्हडा संख्येन हाजीर रावचे हे खातीर आमी यत्न करतात अशें सांगलें. मुरगांव, वास्को, दाबोळी, कुठ्ठाळी ह्या चार मतदार संघांतल्यान उणेच २५ हजार लोक हाजीर रावतले. ते खंयच्या- खंयच्या भागांतल्यान येतले हाचो अहवाल आमी चारूय आमदारांनी घेतला. ही सभा फकत दक्षीण गोंयां खातीर न्हय तर पुराय गोंयां खातीर आसा. ताका लागून उत्तर गोंयचेय हजारांनी लोक हे सभेक येतले अशें गुदिन्हो हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
