भांगरभूंय | प्रतिनिधी
नवी दिल्ली: प्रधानमंत्री नरेंद्र मोदी हांच्या फुडारपणा खाला केंद्रांतल्या सरकाराक १२ वर्सां पुराय जातात. हे खातीर आयज (बुधवारा) दनपरां ३ वरांचेर नवी दिल्लींतल्या भारत मंडपम हांगा राष्ट्रीय लोकशाय आघाडीचीं शासीत राज्यां आनी केंद्र प्रदेशांतले मुख्यमंत्री, उपमुख्यमंत्री आनी वरिश्ठ फुडार्यांची म्हत्वाची बसका जातली. हे बसकेचे अध्यक्ष स्वता प्रधानमंत्री नरेंद्र मोदी आसतले.
हे बसकेंत संरक्षण मंत्री राजनाथ सिंह, केंद्रीय गृहमंत्री अमित शहा हांचे सयत खुबशे केंद्रीय मंत्री हाजीर रावतले. तशेंच उत्तर प्रदेशचे मुख्यमंत्री योगी आदित्यनाथ, महाराष्ट्राचे मुख्यमंत्री देवेंद्र फडणवीस, आसामचे मुख्यमंत्री हिमंत बिस्वा सरमा, मध्य प्रदेशचे मुख्यमंत्री मोहन यादव, गुजरातचे मुख्यमंत्री भूपेंद्र पटेल हांचे सयत एनडीए शासीत २२ राज्यां आनी केंद्रशासीत प्रदेशांचे मुखेली वाटेकार जातले. आंध्र प्रदेशचे मुख्यमंत्री एन. चंद्राबाबू नायडू हांचे सयत इश्टपक्षांचे फुडारीय बसकेक हाजीर रावपाची शक्यताय आसा.
बसकेंत सविस्तर नियाळ घेतले
हे बसकेंत केंद्र सरकाराच्या वेगवेगळ्या कल्याणकारी येवजण्यांचो आनी मुळाव्या सुविधांचो, प्रकल्पांचो नियाळ घेतले आनी ताचो लाव समाजांतल्या निमाण्या घटका मेरेन पावोवपा खातीर गरजेच्या उपाय येवजण्यांचेर चर्चा जातली. तशेंच ‘विकसीत भारत २०४७’ ह्या दृश्टीकोन येवजणेचो नियाळ, अस्तंत आशियांतलो वाडत आशिल्लो ताण आनी ताचे परिणाम अश्या म्हत्वाच्या प्रस्नांचेरूय चर्चा जावपाची शक्यताय आसा.
१२ वर्सांत परराश्ट्र धोरणांत म्हत्वाचो बदल जाला असो दावो
मजगतीं, प्रधानमंत्री मोदीच्या १२ वर्सांच्या कार्यकाळांत भारताच्या परराश्ट्र धोरणांत म्हत्वाचो बदल जाला असो दावो परराश्ट्र मंत्रालयान केला. आंतरराष्ट्रीय सौर आघाडी, युपीआय सारकिल्ल्या डिजिटल भौशीक मुळाव्या साधनसुविधांचो संवसारीक विस्तार, तशेंच विकसीत देशांचो प्रभावी आवाज आनी संवसारीक संकश्टाच्या काळांत पयलो प्रतिसाद दिवपी म्हणून भारताची भुमिका हांचो उल्लेख मंत्रालयान केला.
प्रधानमंत्री नरेंद्र मोदी हांणी नेहरूंचो विक्रम मोडलो
म्हत्वाचें म्हळ्यार १० जुना मेरेन प्रधानमंत्री नरेंद्र मोदी हांणी सेगीत ४,३९९ दीस प्रधानमंत्री म्हणून काम करून भारताचे पयले प्रधानमंत्री जवाहरलाल नेहरू हांचो ४,३९८ दिसांचो विक्रम हुंपलो. म्हणून देशाच्या राजकीय इतिहासांत हो एक म्हत्वाचो टप्पो मानतात. वेगवेगळ्या मळां वयल्या मानेस्तांनी, राजकी फुडारी आनी संवसारीक दर्ज्याच्या व्यक्तींनी हे खातीर प्रधानमंत्र्यांक परबीं भेटयल्यां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
