भांगरभूंय | प्रतिनिधी
पणजी : राज्यांत कॅन्सर, गोडेमुताचें, किडनी, लिव्हर अशे तरेच्या दुयेंसांचें प्रमाण वाडतूच आसा. हाचेर दुयेंत पडले उपरांतूच उपचार घेवप जाता. मात दुयेंत पडचेंच न्हय म्हणून आयुष पद्धत ही एक बरी उपचार पद्धत आशिल्ल्याचें मुख्यमंत्री डॉ. प्रमोद सावंत हांणी सांगलें. बिरेस्तारा सचिवालयात आयुष वेलनेस केंद्राच्या उक्तावणा वेळार ते उलयताले. ह्या वेळार भलायकी मंत्री विश्वजीत राणे, मुखेल सचीव व्हि कांदावेलू, सचीव यतिंद्र मरळकार, डॉ. मीनल जोशी हाजीर आशिल्ले.
प्रतिबंधात्मक भलायकी तपासणी, भलायकी सेवांचेर भर दिवपा खातीर आयुष वेलनेस केंद्र सुरू केलां. आयज उक्तावण केल्ल्या आयुष वेलनेस केंद्राचो फायदो सचिवालयांतल्या कर्मचार्यांक जातलो. कर्मचार्यांनी आयुर्वेदांत नमूद केल्ल्य प्रमाण आपली अवस्था समजून घेवची. योग, प्राणायम पद्धतीय शिकून ताची
आपले जिणेंत अंमलबजावणी करची. कर्मचारी शारिरीक आनी मानसीक नदरेन घटमूट उरचें म्हूण आमी हें केंद्र सुरू केलां, अशें मुख्यमंत्र्यान म्हणलें.
सचिवालया भायर कामा खातीर हांगा येवपी हेर सरकारी कर्मचार्यांक ह्या केंद्राचो लाव घेवपाक मेळटलो. हांगा सकाळीं १० ते सांजेवेळार ५ वरां मेरेन आयुष डॉक्टर उपलब्ध आसतले. गरज पडल्यार हांगा हेर उपचार पद्धतींचें दोतोरूय आपयतले. राज्य सरकारान टाटा कॅन्सर संशोधन हॉस्पिटला वांगडा सामंजस्य करार केला. ते प्रमाण मुळावें भलायकी केंद्र तशेंच गोंय वैजकी महाविद्यालयांत बेगीनूच आयुष ओपीडी सुरू करपाचो आमी यत्न करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
