प्रज्ञा, चंदन, अॅरन हांकां दोट्टी किताब

भांगरभूंय | प्रतिनिधी

अखील गोंय राज्य मेजर मानांकन टेबल टॅनीस सर्तींत अॅरन फारियास, चंदन कारे आनी प्रज्ञा कारे हांकां दोट्टी किताब फावो जालो. दादल्यांच्या एकोड्या गटांत अरविंद कुमार, जाल्यार बायलांच्या एकोड्या गटांत पृथा पर्रीकार हांकां वस्तादपण फावो जालें. सर्त फातोड्डेंच्या मल्टिपर्पझ स्टेडियमांत जाल्ली.

अॅरन फारियासान 17 आनी 19 वर्सां पिराये सकयल्या चल्यांच्या गटांत, चंदनान 13 आनी 15 वर्सां पिराये सकयल्या चल्यांच्या गटांत आनी प्रज्ञा हिणें 15 आनी 17 वर्सां पिरायेच्या चलयांच्या गटांत वस्तादपण जोडलें. 11 वर्सां पिराये सकयल्या गटांत रुहान शेखान चल्यांच्या, जाल्यार आयुषी आमोणकारान चलयांच्या गटांत किताब जिखलो. इशिता कुलासोन 13 वर्सां पिराये सकयल्या, जाल्यार उर्बी सुर्लकारान 19 वर्सां पिराये सकयल्या चलयांच्या गटांत वस्तादपण जोडलें.

दक्षीण गोंय टेबल टॅनीस परिशदेन गोंय टेबल टॅनीस संघटणा आनी गोंय खेळां प्राधिकरणाच्या सहकार्यान सर्त आयोजीत केल्ली. इनामां भेटवण सुवाळ्याक गोंय टेबल टॅनीस संघटणेचे आदले अध्यक्ष व्हेरो नुनीस, सध्याचे अध्यक्ष सुदिन वेरेंकार, सचीव क्रिस्तोफर मिनेझीस, भांडारी एेश्वर्या नुनीस, जोड सचीव निलेश किर्तनी, वांगडी अजीत घाटकार आनी कबीर पिंटो मखिजा उपस्थीत आशिल्ले.

निमाणो निकाल असोः

11 वर्सां पिराये सकयल (चलयो)- आयुषी आमोणकार जैत आड गियाना जॉर्ज 3-0 (11-3, 11-9, 11-6), (चले)- रुहान शेख जैत आड युग प्रभू 3-1 (11-7, 16-14, 11-13, 11-4), 13 वर्सां पिराये सकयल (चलयो)- ईशिता कुलासो जैत आड आयुषी आमोणकार 3-0 (11-2, 11-2, 11-5), (चले)-चंदन कारे जैत आड ध्रुव कामत 3-1 (11-6, 11-2, 10-12, 11-8).

15 वर्सां पिराये सकयल (चलयो)- प्रज्ञा कारे जैत आड नीझा कामत 3-0 (13-11, 11-9, 11-6), (चले)- चंदन कारे जैत आड खुशाल नायक 3-2 (11-8, 11-6, 8-11, 9-11, 11-5), 17 वर्सां पिराये सकयल (चलयो)- प्रज्ञा कारे जैत आड उर्वी सुर्लकार 3-2 (9-11, 12-10, 3-11,11-8, 11-9), (चले)- अॅरन फारियास जैत आड रिशान शेख 3-0 (11-3, 11-3, 11-9), 19 वर्सां पिराये सकयल (चलयो)-उर्वी सुर्लकार जैत आड प्रज्ञा कारे 3-2 (11-9, 6-11, 8-11, 11-5, 11-8), (चले)- अॅरन फारियास जैत आड रिशान शेख 3-1 (11-4, 11-8, 10-12, 11-8).

बायलांचो एकोडो गटः पृथा पर्रीकार जैत आड ईशिता कुलासो 3-0 (11-4, 15-13, 11-8), दादल्यांचो एकोडो गटः अरविंद कुमार जैत आड अॅरन फारियास 4-1 (12-10, 17-15, 12-10, 4-11, 11-7).