भांगरभूंय | प्रतिनिधी
पणजी, बातमीदार : लोकसभा वेंचणुकेंत पोस्टल बॅलेट मतदानाचें काम ५ मे मेरेन पुराय करतले. पोस्टल बॅलेट मतदाना खातीर दोनूय मतदारसंघांनी विशेश सुविधायो उबारतले, अशी म्हायती मुखेल वेंचणूक अधिकारी रमेश वर्मा हांणी मंगळारा वेंचणुके विशीं गोंयच्या राजकीय पक्षांच्या पदाधिकार्यां वांगडा घेतिल्ले बसकेंत दिली.
पत्रकारां कडेन उलयतना वर्मा हांणी, बसकेंत आमी राजकीय पक्षांच्या पदाधिकार्यांक वेंचणूक प्रक्रिया, मतदान प्रक्रिया, आचारसंहिता, वेंचणूक खर्च, सुविधा ऍप आनी हेर विशयांची म्हायती दिल्या. पोस्टल बॅलेट मतदनाची प्रक्रिया समजावन सांगल्या. पोस्टल बॅलेट प्रक्रियेंतले नवे नेम सांगल्या. ते प्रमाण आपूण प्रत्यक्ष पांच दीस आदीं पोस्टल बॅलेटची प्रक्रिया सुरू करतले. मतदनाच्या दोन दीस आदीं म्हळ्यार ५ तारखेक पोस्टल बॅलेट प्रक्रिया सोंपतली, अशें तांणी सांगलें.
मतदारसंघा प्रमाण पोस्टल बॅलेट केंद्र खंय उबारतले? थंय खंयच्यो सुविधा आसतल्यो? वेंचणूक अधिकारी कोण आसतले? हाची म्हायती आमी बेगीनूच दितले अशेंय तांणी फुडें सांगलें.
हे बसकेक विवीध वेंचणूक अधिकारी हाजीर आशिल्ले. तेय राजकीय पक्षांच्या पदाधिकार्यांच्या संपर्कांत रावतले, अशें तांणी म्हणलें.
पोस्टल बॅलेट मतदाना खातीर विशेश केंद्र उबारतले. मतदाना वेळार उमेदवारांच्या प्रतिनिधींक हाजीर रावपाक मेळचें ना. ह्या दोनूय गजालींक आमी येवकार दितात. ताका लागून वेंचणूक कामाचेर आशिल्ल्या सरकारी अधिकार्यांचेर मतदान करतना चेंपण येवचें ना, अशें गोवा फॉरवर्डचे सरचिटणीस दुर्गादास कामत हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
