भांगरभूंय | प्रतिनिधी
पणजी, प्रतिनिधी : खण तशेंच हेर उद्देगां सयत आता वॉशिंग सेंटर, पोल्ट्री, बेकरी, पार्टीची थळां, गोशाळा हांकांय हवा आनी उदक प्रदुशण प्रतिबंध आनी नियंत्रण कायद्या खाला प्रदुशण नियंत्रण मंडळाची मान्यताय घेवप बंधनकारक आसा. मान्यताय घेतली ना जाल्यार नेम मोडपाच्या कारणा खाला संबंदीत आस्थापनां बंद करपाचे निर्देश जारी जातले, अशें प्रदुशण नियंत्रण मंडळान कळीत केलां.
उदक (प्रदुशण प्रतिबंद आनी नियंत्रण) कायदो 1974 आनी हवा (प्रदुशण प्रतिबंद आनी नियंत्रण) कायदो 1981 खाला गोंय राज्य प्रदुशण नियंत्रण मंडळा कडल्यान उद्देगांक/ आस्थापनाक मान्यताय (कंसेंट टु ऑपरेट) घेवची पडटा. आता ह्या आस्थापनांक पसून उदक आनी हवा कायद्या खाला मान्यताय घेवची पडटली.
सर्व्हीसिंग स्टेशन्स, वॉशिंग सेंटर्स, बेकरी, लाँड्री, पोल्ट्री (5 हजारां परस चड कोंबयो), पीठ आनी तांदळाच्यो गिरणी, हॉटेल्स, गेस्ट हावज, बॅकेट हॉल, पार्टी थळां, डेअर (15 परस चड जनावरां), निवासी संकुल (24 परस चड फ्लॅट), धुकर पालन (15 परस चड), भंगसाळी (सॉ मिल्स), गोशाळा, कार्पेंटरी युनिट, चिरे खणी (लॅटरायट क्वेरी) ज्या आस्थापनां कडेन मान्यताय आसा (कंसेंट टु ऑपरेट) तांणी तपशील वाठारांत प्रदर्शित करचो पडटलो. ज्या आस्थापनां कडेन मान्यताय ना, तांणी मान्यताये खातीर अर्ज करचे पडटलें, अशें प्रदुशण नियंत्रण मंडळान कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
