भांगरभूंय | प्रतिनिधी
सुदैवान जिवीत हानी ना; अपघाताची माळ सुरूच
पेडणें: पोरस्कडे राष्ट्रीय म्हामार्गार कंटेनर उमथून 100 मिटर अंतराचेर वचून पडलो. कसलेंच जिवीत लुकसाण जाल्लें नासलें तरी हाचे पयलीं ह्या जंक्शनाचेर अपघात जावन मरण येवपाच्यो घडणुको घडल्यात. हे सुवातेर सर्कल वा उड्डाणपूल उबारचो अशी मागणी केल्ली, पूण हाचे कडेन आडनदर जायत आसा. वाहन चालकान एका टॅक्सी मोटारीक वाटावपाच्या यत्नांत ताबो गेल्ल्याचो दावो केला.
न्हयबाग पोरस्कडे हें जंक्शन राष्ट्रीय म्हामार्ग आनी पयलींचो राष्ट्रीय म्हामार्ग 17 एकाच सुवातेर मेळटा. ताका लागून चार रस्ते चारूय वटांनी वतात. वाहनां येतना, वतना अदमास येनाशिल्ल्यान, तशेंच दिशा दाखोवपी फलक नाशिल्ल्यान हें जंक्शन घातक थारलां. हें जंक्शन बंद करचें हे खातीर पोरस्कडे न्हंयबाग अमेरे पंचायतीन थाराव मंजूर करून लेगीत संबंदीत खात्याक दिला. पूण ताची आयज कार्यवाही जाली ना.
हे सुवातेर खूबशे अपघात जावन बळी गेल्यात. पूण सरकाराक आनीक कितल्या बळींची गरज आसा असो प्रस्न तिडकल्ले नागरीक विचारतात.
हो कंटेनर पणजी मार्गान दिल्ली वतालो. फांतोडेर चार वरांचेर ही घडणूक घडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
