भांगरभूंय | प्रतिनिधी
भांगरभूंय । प्रतिनिधी
पोरणे गोंयः समाज वावुरपी ग्लेन काब्राल हाच्या फुडारपणा खाला पोरण्या गोंयच्या थळाव्या लोकांनी अवर लेडी ऑफ मोन्ते चॅपलाच्या दायज वाठारांतल्या खाजगी सुवातेंत सुरू केल्लें रस्तो बांदपाचें काम बंद केले. तें करपा खातीर हाडल्लें जेसीबी मिशन तांणी पोरण्या गोंय पुलिसांचे सुवादीन केलें. दाजय वाठारांत कसल्याच तरेचें बांदकाम करपाक जायना असो काब्रालाचो दावो आसा.
मोन्त चॅपेलाच्या दायज वाठारांत चलल्ल्या ह्या रस्त्याच्या बांदकाम सुवातेर परवानो दिल्ल्याचो बोर्ड लावंक नाशिल्लो. ह्या कामा विशीं आपणे पयलीं पोरणे गोंय पुलीस स्टेशनात कागाळ केली. उपरांत ह्या कामाची पुरातत्व खात्याचो संचालकाक म्हायती दिवन कारवाय करपाची मागणी केल्या. कागाळेच्यो पत्री पोरणे गोंय पंचायत मंडळाकसादर केल्या अशें काब्रालान सांगलें.
जाणे हें रस्त्याचें बांदकाम चलयलां ताणे प्रकल्पाक नगर नियोजन खात्यान मान्यताय दिल्या अशें सांगलें. मात पोरणे गोंय पंचायत मंडळान अजून त्या कामाक परवानगी दिल्ली ना. संबदीत कामाची फायल सद्या पंचायतींत पावल्या आनी पंचायत मंडळाचे पंद्रशींतले बसकेंत तिचेर विचार करतले अशें आपल्याक सांगलां. मात पंचायतीन मान्यताय दिवचे पयलीं कामाक कशी सुरवात केली असो ताचो प्रश्न आसा.
ह्या बांदकामां विशीं मोन्त चॅपेलाचें काम पळोवपी कॅथेड्रल चॅपेलान बांदकामा आक्षेप घेतला. रस्त्याचें काम बंद उडोवपाच्या कामाक मारयाण फेर्रांव आनी जॉन मस्कारेन्हास हाणी तेंको दिला. पोरण्या गोंयच्या दायज वाठारांत ल्हिपचोरयां कामां चल्ल्यांत असो आरोप तांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
