भांगरभूंय | प्रतिनिधी
पणजीः खंयच्याय उद्देगा खातीर जमीन म्हत्वाची आसता. गोंया सारक्या ल्हान राज्यांत जमीन मेळप म्हत्वाची आसा. ते खातीर आमी संकेतथळाचेर आयडीसीचो वा आयपीबीचे खंयचे प्लॉट बोली खातीर उपलब्ध आसात, ताची म्हायती दितले. नव्या उद्देगां सयत पोरण्या उद्देगांक लेगीत आमी सवलती दितले. ते खातीर आमी पोरण्या उद्देगांक दुपेट एफएआर दिवपाचें थारायलां, अशें उदेग मंत्री मॉवीन गुदिन्हो हांणी इन्व्हेस्ट गोवाच्या उक्तावण सुवाळ्या उपरांत पत्रकारां कडेन उलयतना सांगलें.
आयज आमी सीआयआय वांगडा समजिकायेची कबलात केल्या. ताका लगून गोंयांत एक हजार जाणांक रोजगार उपलब्ध जातले. फुडारांत अश्यो समजिकाय कबलाती करतले, अशें मंत्री गुदिन्हो हांणी सांगलें. गुंतवणूकदारांक उर्बा दिवचे खातीर आमी विवीध उपक्रम चालीक लायल्यात. ते प्रमाण आमी आयडीसीची नवी नेमावळ जाहीर केल्या. आयडीसीच्या कामांत पारदर्शकता येवची हे खातीर आमी डिजिटल तंत्रज्ञानाचो वापर केला. ते प्रमाण आयडीसीचे संकेतथळ, पोर्टल लेगीत सुरू केला. ते वरवीं तांत्रीक अर्जांक थारावीक वेळांत मंजुरी दिवप शक्य आसा, अशें मंत्री गुदिन्हो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
