भांगरभूंय | प्रतिनिधी
पणजी: पोरणें गोंया गांधी सर्कला कुशीक राविल्ले बशीक फाटल्यान धपको दिल्ल्यान दुचाकी चालक राम बैठा (34, पोरणें गोंय) गंभीर जखमी जालो. ह्या प्रकरणांत पोरणें गोंय पुलिसांनी वाहन अपघाताची नोंद करून तपास सुरू केला.
पोरणें गोंय पुलिसांनी दिल्ले म्हायती प्रमाण सोमारा 10 वेर सकाळीं सुमार 9.30 वरांचेर पोरणें गोंया गांधी सर्कला कुशीक प्रवासी बस आनी दुचाकी मदीं अपघात जालो.
खोर्ली सावन पणजे वचपी प्रवासी बस प्रवाशांक घेवपा खातीर राविल्ली. ह्याच वेळार ताचे फाटल्यान दुचाकी चालक राम बैठा हाचें दुचाकी वेलें नियंत्रण सुटलें आनी ताणें बशीक फाटले वटेन नेटाचो धपको दिलो. ह्या वेळार ताचे तकलेक गंभीर दुखापत जाली. उपरांत ताका बांबोळे गोमॅकाँत दाखल केलो. ताचेर वॉर्ड 108 त उपचार सुरू आसात.
अपघाताची म्हायती मेळटकच पोरणें गोंय पुलीस निरिक्षक राघोबा कामत हांच्या मार्गदर्शना खाला हवालदार समीर नायक हांणी अपघाताचो गुन्यांव नोंद करून तपास सुरू केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
