भांगरभूंय | प्रतिनिधी
राहूल गांधी भशेन अशी वेळ कोणाचेरूय येवंक शकता: विरोधी फुडारी
पणजी: मानहानी प्रकरणांत न्यायालयान दोशी थारायले उपरांत राहूल गांधी हांकां लोकसभेंतल्यान अपात्र केल्ल्यान ह्या अन्यायाच्या निशेधार्थ काल (आयतारा) पोरणें गोंया गांधी पुतळ्या कुशीक गोंय काँग्रेसीन ‘संकल्प सत्याग्रह’ केलो. हातूंत राष्ट्रवादी काँग्रेस पक्षानूय सहकार्य केलें. भाजप सरकार, विरोधी पक्षांतल्या कोणाचेरूय अशी वेळ हाडूंक शकता. ताका लागून सगल्यांनी एकठांय येवन हाचे आड लढो दिवचो पडटलो अशें ह्या वेळार हाजीर आशिल्ल्या सगल्या विरोधी फुडाऱ्यांनी सांगलें.
ह्या ‘संकल्प सत्याग्रहांत विरोधी पक्ष फुडारी युरी आलेमांव, आमदार एल्टन डिकॉस्टा, आमदार कार्लोस फरेरा, खासदार फ्रान्सीस सार्दीन, काँग्रेस प्रदेशाध्यक्ष अमीत पाटकार, राष्ट्रवादी कॉँग्रेस पक्षाचे प्रदेशाध्यक्ष जुझे फिलीप, कॉंग्रेस महिला अध्यक्ष बिना नायक, अॅड. वरद म्हाड्डोळकार, एम. के. शेख, अमरनाथ नायक, युवा अध्यक्ष जॉयल आंद्रें, संजय बर्डे आनी हेर कार्यकर्ते हाजीर आशिल्ले.
राहूल गांधी हांणी अदानी आनी भाजप हांचे संबंद लोकां मुखार हाडिल्ल्यान तांकां ओगी करपा खातीर अपात्र केला. कर्नाटकांत स्टील इंडस्ट्री येतली आनी तांकां सहकार्य करपा खातीर केंद्र सरकारान मुख्यमंत्री प्रमोद सावंत हांकां म्हादयचें उदक घुंवडावपाक सांगलां. राहूल गांधी हांकां दोन वर्सांची ख्यास्त सुनायले उपरांत 24 वरांत तांकां अपात्र केले. पूण गोंयांत 18 आमदारां आड अपात्रताय याचिका दाखल केल्या ताचेर निर्णय कित्याक जायना अशें विरोधी पक्ष फुडारी युरी आलेमांव हांणी सांगलें.
भाजप सरकार लोकशाये आड काम करता. भाजपाच्या विरोधांत उलयल्यार लोकांक आनी पत्रकारांक लेगीत स्वातंत्र्य उरिल्लें ना. विरोधांत उलयल्यार हें सरकार तांकां बंदखणींत उडयतात. कांय म्हयन्यां पयलीं दिल्लींतल्या आम आदमी पक्षाच्या फुडाऱ्याक बंदखणींत घालो. आतां राहूल गांधी हांकां बंदखणींत उडोवपाची तयारी केल्या अशें केपेंचे आमदार एल्टन डिकॉस्टान म्हणलें.
भाजपा सरकाराक लागून लोकशाय घाताक आयल्या, जाल्यार हुकुमशाय सुरू जाल्या. हाचे आड क्रांती जावंकूच जाय. राहूल गांधी हांणी पदयात्र काडले उपरांत तांचे बरोबर लाखांनी लोक आशिल्ल्याचें नदरेक आयले उपरांत केंद्र सरकाराक भिरांत दिसूंक लागली म्हणून तांचेर ही कारवाय केली, अशें काँग्रेस प्रदेशाध्यक्ष अमीत पाटकार हांणी सांगलें.
राहूल गांधी हांणी कांयच चुकीचें केलें ना. जे खातीर तांकां दोन वर्सांची ख्यास्त दिल्या त्या गुन्यांवा खातीर सगल्यांत चड दोन वर्सांची ख्यास्त आसा. तांकां स म्हयने, एक वर्स वा देड वर्स ख्यास्त लेगीत दिवं येताली. तांच्या ह्या निर्णया वयल्यान देशांत कितें सुरू आसा हें लोकांनी पळयलां अशें आमदार कार्लोस फेरेरा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
