भांगरभूंय | प्रतिनिधी
भांगरभूंय । प्रतिनिधी
काणकोणः पोटकें- पैंगीण हांगा खेळां मैदान उबारपाची मागणी फाटल्या चाळीस वर्सां सावन चल्ल्या. मैदाना खातीर जमीन संपादन करून दवोरल्या. वेगवेगळ्या खेळां मंत्र्यांनी ताचो तीन फावट बुन्यादी फातोर बसयल्लो. आतां चवथे फावट तो काणकोणचो आमदार आनी सभापती रमेश तवडकार हाणे बसयला. ताच्या नांव तकट्याचें अनावरण करतना तवडकारान मैदानाचे काम बंद पडचें ना अशें उतर दिलां.
नाल्ल फोडून नांव तकट्याचें अनावरण करपाचे कार्यावळीक पैंगीणची सरपंच सविता तवडकार उपसरपंच सुनील पैंगीणकार, काणकोण पालिका मंडळाचो नगराध्यक्ष रमाकांत नायक गांवकार, काणकोण भाजपा मंडळ अध्यक्ष विशाल देसाय, जिल्हो पंचायत वांगडी शोभना वेळीप, थळावो पंच सतीश पैंगीणकार, लोलयेची सरपंच निशा च्यारी, प्रवीर भंडारी, शिल्पा प्रभुगांवकार, अस्मिता जोशी, सचीन नायक, अभियंतो दीपक लोटलीकार, ऱाना खात्याचो अधिकारी प्रेमकुमार, आगोंदचो सरपंच आनंदु देसाय, विंदा सतरकार, चंदा देसाय, विनय तुबकी, महेश नायक, गेस्टन डायस, चंद्रकांत सुदीर, दिवाकर पागी, डॉ पुष्पा अय्या हाजीर आशिल्ली.
पैंगीणच्या दरेका ग्रामसभेंत पोटकें मैदानाचो प्रश्न गाजतालो. हाच्या फुडें तो येवचो ना. मैदान बांदपा खातीर तीन कोटी रुपये मंजूर जाल्यात अशें रमेश तवडकार हाणे सांगलें. चावडी- काणकोण हांगच्या रवींद्र भवनाचें उक्तावण मे म्हयन्यांत जातलें. मार्ली तिर्वाळ हांगां 155 कोटी रुपये खर्च करून जमनी पोंदच्यान वीज केबल घालतले. केरी हांगां 15 कोटी रुपया खर्च करून वीज पुरवण करतले तशेंच गावणे हांगच्या धरणाचो प्रस्न सुटावो करतले अशी म्हायती ताणे दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
