भांगरभूंय | प्रतिनिधी
म्हापशें: पोंबुर्फें-वळावली सरपंचपदार सोनिया सूरज चोडणकार हांची बिनविरोध निवड जाली. लिओपोल्दिना फर्नांडीस ई नरोन्हा हांणी पदाचो राजिनामो दिल्ल्यान हें पद रितें जाल्लें.
शुक्रारा सकाळीं पंचायत घरांत नव्या सरपंच निवडी खातीर पंचायत मंडळाची खाशेली बसका जाली. सरपंचपदाचे निवड प्रक्रिये वेळार सोनिया चोडणकार हांचो एकूच अर्ज सादर जालो. ताका लागून तांची सरपंचपदार बिनविरोध निवड जाल्ल्याचें निर्वाचन अधिकाऱ्यांनी जाहीर केलें.
निवड प्रक्रियेचें कामकाज गटविकास अधिकारी कचेरेचे विस्तार अधिकारी शिरीषकुमार तारी हांणी पळयलें. तांकां पंचायत सचीव क्रितेश कोरगांवकार हांणी सहकार्य केलें.
ह्या वेळार उपसरपंच शंकर बुडे, गोकुळदास हळर्णकार, समीर चोडणकार, मारीया फर्नांडीस, सुर्या हडफडकार आनी लिओपोल्दिना फर्नांडीस ई नोरोन्हा हे सगले पंच वांगडी हाजीर आशिल्ले.
मजगतीं, आदल्यो सरपंच लिओपोल्दिना फर्नांडीस ई नोरोन्हा हांचो राजिनामो फाटल्या 15 सप्टेंबर दिसा पंचायत संचालकांनी ग्राह्य धरिल्लो. तेन्ना सावन फाटलो देड म्हयनो हें पद रितें आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
