भांगरभूंय | प्रतिनिधी
म्हापशें, प्रतिनिधी : रानांतल्या रस्त्यांचे उदरगती खातीर ना हरकत दाखलो दिवप, म्हळ्यार गोंय पंचायत राज कायदो मोडप. तशेंच सरपंचांक सय करून एनओसी दिवपाचो अधिकार ना, जाल्यार तो पंचायत सचिवांक आसा, असो दावो करीत पोबुर्फा-ओळावली ग्रामस्थांनी सरपंचांच्या राजीनाम्याची मागणी केली.
सरपंच लिओपोल्दिना फर्नांडीस ई नोरोन्हा हांचे अध्यक्षते खाला पोंबुर्फा-ओळावली ग्रामपंचायतीची ग्रामसभा जाली. ह्या वेळार गटविकास अधिकारी कार्यालयाचे प्रतिनिधी हाजीर आशिल्ले.
ग्रामसभेंत जमनी पोंदच्यान लायटीच्य सरयो घालपाचें काम, मटेरियल रिकव्हरी सुविधा, कोयराचें वेवस्थापन, पोंबुर्फा झर वाठार जैवविविधता दायज स्थळ म्हणून घोशीत करप, गांवांत जलतरण तळें आनी बोअरवेलीक मान्यताय ना, खाजन शेतांनी घुसपी खारें उदक आनी हेर विशयांचेर चर्चा जाली.
एकोशे रान वाठारांत रस्त्याच्या बांधकामाच्या मुद्याचेर ग्रामस्थांनी पंचायत मंडळाक धारेर धरलें. मोडून उडोवपाच्या आदेशाची स्थिती आनी कारवाय कित्याक करूंक ना, असो प्रस्न केलो. पंचायतीन रान वाठारांतल्या उदरगतीच्या कामांची ही म्हायती रान खात्याक दिल्ली? असोय प्रस्न ग्रामस्थांनी ह्या वेळार हाजीर केलो.
ग्रामस्थ धीरेंद्र फडते हांणी सरपंचान आपल्या अधिकारांत नासतना रस्त्या खातीर नाहरकत दाखलो कसो दिलो, असो प्रस्न हाजीर करून तांच्या राजीनाम्याची मागणी केली. रस्त्याचें बांदकाम काडपाचो आदेश दिवन लेगीत बेकायदो रस्त्या विशीं कारवाय कित्याक जावंक ना, असो प्रस्न तांणी केलो. हेर ग्रामस्थांनीय तांकां फाटबळ दिलें. मात सरपंचान आपलें पद सोडपाक न्हयकार दिलो. उपरांत पंचायत सचिवांक नकळत सरपंचांनी नाहरकत दाखल्याची परवानगी दिल्ले खातीर तांचो राजिनामो मागपी थाराव एकमतान घेतलो.
गांवांत उदकाचें तळें आनी बोअरवेलच्या समस्यां विशीं समित सरदेसाय हांणी प्रस्ताव मांडून गांवांत तळें आनी बोअरवेलचे बांदकाम करचें न्हय, अशी मागणी केली. ते प्रमाण उदकास्त्रोत खातें आनी नगरनियोजन खात्याक पत्र धाडपाचो थाराव घेतलो.
पोंबुर्फा झर आनी आशिकुशीकच्या वाठाराक जैवविविधताय वासरा स्थळ म्हणून घोशीत करपाचो प्रस्ताव एका ग्रामस्थान मांडलो. जाका लागून झर संरक्षीत करतले. हो प्रस्ताव मान्य करून थाराव घेतलो.
गांवांत सुरू आशिल्ल्या जमनी पोंदच्यान लायटीच्यो सरयो घालपाच्या कामांच्या मुद्याचेर गॅमलीन फर्नांडीस हांणी, विजेच्यो सरयो जमनी पोंदच्यान घालपा खातीर गांवांतले रस्ते खणले. ताका लागून रस्त्यांची अवस्था सामकी बाबत जाल्या. रस्ते खणपाक एचडीटी मशी वापरचें, जाका लागून उण्यात उणे रस्ते खणप जातलें. हाका लागून पंचायतीन आमदार आनी वीज खात्याक पत्र धाडून जोड बसका घेवपाची मागणी तांणी केली.
आदले सरपंच विनय चोपडेंकार हांणी आड नदर जाल्ल्या सुचवणी तक्ट्यां कडेन पंचायत मंडळाचें लक्ष ओडून हे तक्टे आदले वरी करपाची मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
