पे पार्कींग शुल्का विशीं म्हापशें पालिका काळखांत

भांगरभूंय | प्रतिनिधी

लेखा विभाग आनी मुख्याधिकाऱ्यांचो भायलेभायर निर्णय

भांगरभूंय । प्रतिनिधी

म्हापशें: म्हापशेंच्या टॅक्सी स्टॅण्डा वयल्या पे पार्कींग शुल्कांत म्हापशें पालिकेन जीएसटी सयत सरसकट 60 रुपया वाड केल्या. पालिका मंडळाक काळखांत दवरून लेखा विभाग आनी मुख्याधिकाऱ्यान भायलेभायर ही दरवाड लागू केल्या. ह्या प्रकाराचेर दिसाळीं तशेंच गोवा कॅन संस्थेन आवाज काडिल्ल्यान बिरेस्तारा 18 एप्रीलाक सकाळच्यान टॅक्सी स्टॅण्डा वयलें पे पार्कींग शुल्क घेवप पालिकेन तात्पुरतें स्थगीत दवरलां.

एका जागरूक गिरायकान ह्या पे पार्कींग दरा संबंदांत गोवा कॅन संस्थे कडेन कागाळ केल्ली. हो दर पणजेच्या पे पार्कींग दरा परस तिपेट आसा. पालिकेच्या ह्या मनमानी धोरणा आड गोवा कॅन संस्थेन पालिका संचालनालया कडेन हे संबंदान कागाळ करून पालिके कडल्यान स्पश्टीकरण मागलां. तेचवरी जिल्होधिकाऱ्यान फाटल्या जूनांत म्हापशेंच्या पे पार्कींग शुल्काचे दर अधिसुचीत केल्ले. ते प्रमाण दोन वरां खातीर दुचाकींक 10 रुपया जाल्यार चारचाकीं खातीर 20 रुपया, असो दर अधिसुचीत केल्लो.

हे अधिसुचोवणेचें पालिका मुख्याधिकारी चंद्रकांत शेटकार हांणी थेट उल्लंघन करून तशेंच पालिका मंडळाक विस्वासांत घेनासतना टॅक्सी स्टॅण्डा वयल्या पे पार्किंगाच्या दरांत वाड केली. 20 रुपयां वयल्यान हो दर 50 रुपया केलो. तातूंत 10 रुपया जीएसटी कराचो आस्पाव करून शुल्काची ही रकम 60 रुपया केली. हें नवें पे पार्किंगाचें शुल्क सोमारा 15 एप्रीलाच्यान घेवपाक सुरवात केली. पो पार्कींग दरांत इतली व्हड वाड करपाच्या निर्णया विशीं विचारल्लयार पालिका मुख्याधिकारी लेका तशेंच प्रशासकीय अधिकाऱ्यां कडेन जाल्यार पालिकेच्या लेखा तशेंच प्रशासकीय अधिकाऱ्यांनी नगराध्यक्षा कडेन बोट दाखयलें.

हे संबंदांत नगराध्यक्ष डॉ. नूतन बिचोलकार हांणी सांगलें, सरकारा कडल्यान पार्किंगे वांगडा जीएसटी घेवपाचें परिपत्रक आयिल्लें. ते प्रमाण पालिका कर्मचाऱ्यांनी जीएसटी घेवपाक सुरवात केली. तेच खातीर हो दर 60 रुपया जालो. हे आदीं हो दर चारचाकीं खातीर 50 रुपया आशिल्लो आनी जीएसटीक लागून आनीक 10 रुपया वाडले, अशें स्पश्टीकरण तांणी दिलें. मात पालिकेन चारचाकींक 50 रुपया शुल्क केन्ना लागू केलें वा तसो थाराव पालिका बसकेंत घेतला काय ना, हाची फावोशी जाप मात तांकां दिवपाक जाली ना. आपणें हालींच नगराध्यक्षपदाचीं सुत्रां हातांत घेतल्यात. वाडीव पे पार्कींगचो थाराव घेतला काय ना, ताची आपूण चवकशी करता, अशें तांणी सांगलें. हाचे वयल्यान नगराध्यक्षाक ह्या प्रकरणा विशीं कांयच खबर नाशिल्ल्याचें स्पश्ट जाता.

पोरूं भशेन चालू अर्थीक वर्सांत लेगीत पे पार्कींग आनी सोपो निविदेक बोलीदार मेळूंक ना. पालिकेन स्वताच्या कर्मचाऱ्यां वतीन पो पार्कींग आनी सोपो शुल्काची वसुली करपाक सुरवात केल्या. टॅक्सी स्टॅण्डा वयल्या पे पार्कींग शुल्क तकट्याचेर नवो वाडीव दर बरोवन ते विशींची म्हायती वाहनचालकांक पालिकेन दिवपाक जाय. पूण तकट्या वयले आदले दर खोडून हो बेकायदो प्रकार पालिकेन चलयला. पालिका मंडळान हो पे पार्कींग दरवाडीचो निर्णय घेवंक नासतनाय हो नवो दर कसो लागू केलो, असो प्रस्न गोवा कॅनान उपस्थीत केला.

40 रुपया कोणाच्या बोल्सांत ?

प्रत्यक्षांत अधिसुचीत केल्लो पे पार्कींगचो दर 20 रुपया आसतना म्हापशें पालिके कडल्यान 60 रुपया घेतात. ताका लागून ह्या शुल्काच्या नांवान घेतात ते अतिरिक्त 40 रुपया कोणाच्या बोल्सांत वतात, असो प्रस्न पालिका मंडळांतल्या नगरसेवकांनीच उपस्थीत केला. हो बेकायदो आनी भायलेभायर निर्णय घेवन पालिका मंडळाक कातरेंत धरपी ह्या पालिका अधिकाऱ्यांचेर नगरविकास खात्यान कारवाय करची, अशी मागणी ह्या नगरसेवकांनी केल्या.

नगराध्यक्ष, उपनगराध्यक्ष आनी भाजपाप्रणीत पालिका मंडळाक आपल्या अधिकारी आनी कर्मचाऱ्यांच्या भोंगळ गैरकारभाराची कल्पनाच ना, हें हातूंतल्यान स्पश्ट जाता. मार्केटांत मुळाव्या सुविधांचो उणाव आसा. पालिका मंडळान थाराव घेनासतना लोकां कडल्यान वाडीव पयशे वसूल करतात, हें गणीत कळपा फुडलें आसा.

– अ‍ॅड. शशांक नार्वेकार, नगरसेवक