भांगरभूंय | प्रतिनिधी
पेत्रोलाच्या 87 पयशांनी आनी डिझेलाच्या दरात 91 पयशांनी वाड
नवी दिल्ली, खबरां संस्थाः पेत्रोल आनी डिझेलाच्या दरांनी शेनवारा परतून वाड जाली. फाटल्या 10 दिसांत तिसरे खेपे दर वाडल्यात. पेत्रोलाच्या दरांत लिटरा फाटल्यान 87 पयशांनी आनी डिझेलाच्या दरात 91 पयशांनी वाड जाल्या. आंतरराश्ट्रीय बाजारांत कच्च्या तेलाचे दर वाडत आशिल्ल्यान आनी अस्तंत आशियांतल्या भू-राजकी तणावाक लागून इंधनाच्या दरांचेर दबाव वाडला अशें म्हण्टात.
दिल्लींत पेट्रोलाचे दर 98.64 रुपया वयल्यान लिटरा फाटल्यान 99.51 रुपया मेरेन वाडल्यात. डिझेलाचे दर 91.58 रुपया वयल्यान लिटरा फाटल्यान 92.49 रुपया मेरेन वाडल्यात. हे नवे दर वाडीक लागून सर्वसामान्य नागरिक, प्रवाशी, येरादारी करपी आनी वेगवेगळ्या उद्देगीक मळावेलो खर्चाचो भार आनीक वाडपाची शक्यताय आसा. म्हाल येरादारीचो खर्च वाडलो जाल्यार ताचो परिणाम म्हारगायेचेरुय जावं येता.
पेत्रोल आनी डिझेलाचो फावो तितलो सांठो
मजगतीं, देशांत पेत्रोल आनी डिझेलाचो फावो तो सांठो आसा अशें पेट्रोलियम आनी सैमीक वायू मंत्रालयान स्पश्ट केलां. नागरिकांनी वावड्याचेर विस्वास दवरचो न्हय आनी फकत तांच्या गरजे प्रमाण इंधन घेवचें असो उलो मंत्रालयान केलां. तशेंच कांय पेट्रोल पंपांचेर तात्पुरतो ताण नियंत्रणांत हाडपा खातीर तेल कंपनींनी सेगीत पुरवण आनी वितरणाची येवजण आंखल्या अशेंय मंत्रालयान सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
