भांगरभूंय | प्रतिनिधी
पेंवपा तळ्याचीय जातली दुरुस्ती: गोविंद गावडे
म्हापशें: पेडें म्हापशें हांगासरल्या भाऊसायब बांदोडकार खेळां संकुलांतल्या सिंथेटीक ट्रॅक (धांवपट्टी) उक्ती करतले. तशेंच पेंवपा तळ्याचे दुरुस्तीक प्रशासकी मान्यताय मेळ्ळ्या आनी रोखडीच ताची निविदा काडटले अशी म्हायती खेळां मंत्री गोविंद गावडे हांणी दिली.
खेळां संकुलांत आयोजीत अखील गोंय मास्टर्स टेबल टॅनीस लीग 4.0 च्या उक्तावणा वेळार मंत्री गावडे उलयताले. ह्या वेळार आदले आमदार ग्लेन टिकलो हाजीर आशिल्ले.
हालींच शिवसेना उबाठा पक्षाच्या प्रदेश शिश्टमंडळान पेडें मैदाना वेल्या अधिकाऱ्यांक निवेदन सादर करून वॉकींग ट्रॅक उक्तो करपा सयत पेंवपा तळ्याची दुरुस्ती करपाची मागणी केल्ली.
मैदाना वेलो हो सिंथेटीक ट्रॅक (धांवपट्टी) चवथी उपरांत उक्तो करतले. कारण आमकां कांय उपकरणां दवरपाची आसात. ही धांवपट्टी सामान्य नागरिकांक वॉकिंगे खातीर न्हय जाल्यार धांवपी गड्यांच्या सरावा खातीर आसा. तरी लेगीत आमी ट्रॅकाच्या एके वटेनची रांग चलपा खातीर उक्ती करून दितले अशें मंत्री गावडे हांणी सांगलें.
पेडें मैदानार पेंवपा तळ्याच्या दुरुस्तीची निविदा काडटले. टायल्स आनी हेर कामांचो तातूंत आस्पाव आसतलो. आमकां ह्या कामा खातीर हाचे पयलींच प्रशासकी मंजुरी मेळ्ळ्या आनी हें काम रोखडेंच हातांत घेतले अशें तांणी सांगलें.
मजगतीं, हे कार्यावळी उपरांत म्हापशेंच्या क्रिकेट खेळगड्यां कडेन मंत्री गावडे हांणी संवाद सादलो. फाटल्या कांय म्हयन्यां सावन ह्या खेळां संकुलांतलें क्रिकेट मैदान बंद दवरिल्ल्याचो मुद्दो ह्या खेळगड्यांनी उपस्थीत केलो आनी खेळपा खातीर मैदान उक्तें करपाची मागणी केली.
ह्या खेळगड्यांची गाराणीं आयकून घेतले उपरांत मंत्र्यांनी सांगलें, मैदानार सोऱ्याच्यो बाटल्यो आनी प्लास्टिकाच्या बाटल्यांचो सांचिल्लो कोयर दिसून आयलो. हाका लागून मैदान बंद केलें. लोकांनी चड करून खेळगड्यांनी मैदानाची नैतिकता पाळूंक जाय अशी सुचोवणी करून क्रिकेट खेळपा खातीर मैदान उक्तें उरतले अशें आस्वासन मंत्री गावडे हांणी दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
