भांगरभूंय | प्रतिनिधी
हजारांनी रुपयांचो चुरो; राष्ट्रीय खेळां सर्ती वेळार हाडिल्ल्यो कुंड्यो
म्हापशें: राष्ट्रीय खेळां सर्ती खातीर हजारांनी रुपया मोडून पेडें, म्हापशें मैदानार सोबे खातीर लायिल्लीं फन पाल्म झाडाचीं रोंपां सुकून मैदानाक विद्रुपीकरणाचें स्वरूप आयलां.
फाटल्या ऑक्टोबर-नोव्हेंबर 2023 मजगतीं गोंयान राष्ट्रीय खेळां सर्तीच्या आयोजनाचें प्रतिनिधित्व केल्लें. हे खातीर राज्यांतल्या मुखेल खेळां मैदानांचेर सरकाराच्या खेळां खात्या वतीन मुळाव्यो साधन सुविधा उबारिल्ल्यो.
ह्या खेळां सर्तींतल्यो कांय सर्ती पेड्यां सर्गेस्त भाऊसायब बांदोडकार खेळां संकुलांत जाल्ल्यो. ताका लागून ह्या मैदानाचेंय सरकारान नुतनीकरण करून सोबितीकरण केल्लें.
देशभरांतले खेळगडे हे सर्तींत वांटेकार जाल्ले. हाका लागून पेडें खेळां संकुलाक नवी सोबा दिल्ली. ह्या खेळगड्यांच्या तशेंच खेळां मोगींच्या आकर्शणा खातीर खेळां संकुलाच्या प्राकारांत रस्त्यांचे दोनूय वटेनच्या फुटपाथार फन पाल्म झाडांच्या रोंपांच्यो कुंड्यो दवरिल्ल्यो.
पूण खेळां सर्त सोंपले उपरांत ह्या कुंड्यांतल्या रोंपां कडेन आडनदर केली. तांकां उदक घालें ना. ताका लागून अवघ्या तीन ते चार म्हयन्यांत हीं रोंपां सुकून मरून गेलीं. ह्या रोंपांचेर खेळां खात्यान हजारांनी रुपया खर्च केल्ले. हीं रोंपां सुकून गेल्ल्यान हजारांनी रुपयांच्या भौशीक पयशांचें लुकसाण जालें.
सद्याचें सरकार हें इव्हेंटाचें सरकार आसा. ताका लागून तांकां भौशीक पयशांच्या लुकसाणीचें कांयच देणेघेणे ना. इव्हेंटाच्या नांवा खाला भौशीक पयश्यांचो उपद्रव सुरूच आसा. पेडें खेळां मैदाना वेल्या हजारांनी रुपयांची रोंपां सुकून वचप हो खेळां खात्याच्या इव्हेंटाचो एक भाग आसा. पूण ह्या सरकाराक ताचें सूख-दुख्ख कांयच ना असो आरोप काँग्रेसीचे फुडारी विजय भिके हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
