भांगरभूंय | प्रतिनिधी
पेडणें, प्रतिनिधी: पेडणें म्हालांतल्या दोंगरावेल्या बागायतींक लागपी उजो कोण आडायतलो, हो गंभीर प्रस्न निर्माण जाला.
वट्ट २१ ग्रामपंचायत आनी एक नगरपालिका ह्या तालुक्यांत आसा. हांगां व्हडा प्रमाणांत शेत जमनी, बिगर शेत जमनी, पडिंग जमनी, दोंगर-मळे, दर्यादेग वाठारांतल्यो जमनी बिगर गोंयकारांनी म्हळ्यार दिल्लीच्या वेवसायिकांनी आपल्या ताब्यांत घेतिल्ल्याचें चित्र पळोवपाक मेळटा. तशेंच वता थंय उलो लावन झाडां, काजी, बागायती नश्ट करपाचो यत्न येसस्वी जाता. हें सगळें कोण आडायतलो, असो प्रस्न सध्या ह्या म्हालाक सतायता.
उजो लागपाच्या घटणुकांनी वाड
दोंगरांक सैमीक तरेन वा केन्नाय उजो लावप हें चालूच आसा. मात मुद्दम काजू बागायती, झाडांक उजो लावन तीं नश्ट करपाचे प्रकार व्हडा प्रमाणांत वाडल्यात. फुडाराक हें जर आडावंक ना जाल्यार पुरायेन दोंगर मळेय बिगर गोंयकारांच्या ताब्यांत वतले. कांय सुवातांचेर व्हडा प्रमाणांत जमनी दिल्लीचे वेवसायीक, चित्रपट अभिनेते, क्रिकेटपटू, चित्रपट निर्माते, उद्देजक अश्या लोकांनी विकत्यो घेतिल्ल्याचें चित्र दिसता. पुराय मांद्रें मतदारसंघांतल्या दर्यादेग वाठारांतल्यो जमनी विकल्यो आनी उपरांत दोंगर, मळेय विकत घेवपाचे प्रकार वाडल्यात.
केरी, पालयें, मांद्रें, अश्वें, मोरजी, आगरवाडो, पार्से, मोपा, इब्रामपूर, वझरी, हणखणें ह्या वाठारांतले दोंगर बिगर गोंयकार वेवसायिकांनी विकते घेतल्यात. ह्या दोंगरांक उजो लागपाच्यो घडणुको वाडल्यात. उजो लागिल्लो नदरेक पडल्यार जागृत नागरीक उजो पालोवपी दळाक फोन करता. पेडणें वा बार्देसचे उजो पालोवपी दळ उजो पालयतात. हो उजो जांणी जमनी घेतल्यात तेच लायतात, अशी म्हायती सुत्रां कडल्यान मेळ्ळ्या.
दर्या देगे वयलो जमनी विकून सोंपल्या उपरांत आतां दोंगरा वयल्यो जमनी सगल्यांचें लक्ष ओडून घेवपाक लागल्यात. दोंगरा वयल्यो ३०% जमनी आजूनय आसात. ह्या जमनींचेरूय बिगर गोंयकारांनी लक्ष केंद्रीत केलां. थळावे नागरीक वा थळावे उद्देजक दोंगर विकते घेवपाक शकनात. मात बिगर गोंयकार लाखांनी चौरस मीटर जमनी अश्योच विकते घेतना पळोवपाक मेळटा.
सामाजीक कार्यकर्ते अल्बर्ट फर्नांडीस हांणी हे विशीं प्रतिक्रिया दितना सांगलें, दोंगर वाटावपाक जाय. आयज दोंगर वाटावंक ना जाल्यार फाल्यां गांवूय उरचे नात. सैमान नटिल्लो हो गांव सुरक्षीत दवरपाक दरेका म्हालांतल्या सरपंच, नागरीक, समाजीक कार्यकर्त्यांनी फुडाकार घेवंक जाय. सध्या मुद्दम दोंगरांक उजो घालतात, असो दावो तांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
