भांगरभूंय | प्रतिनिधी
पणजीः श्रीपाद नायक हांणी कसलेंच काम करूंक ना, तरणाट्यांक कसल्योच नोकऱ्यो दिवंक नात असले आरोप जावपी वाठारांनी 2024 लोकसभा वेचणुकेंत श्रीपाद नाईक हेच पयल्या नंबराचेर तिगून उरल्यात. पूण फाटले 2019 लोकसभा वेंचणुकेच्या तुळेंत हे खेपेच्या लोकसभा वेंचणुकेंत भाजपाच्या मतांनी उणाव पळोवंक मेळ्ळो.
पेडणें म्हालांत जेन्ना उत्तर गोंयचे खासदार आनी केंद्रींय मंत्री श्रीपाद नायक प्रचार करपाक वताले, तेन्ना व्हडले प्रकल्प हाडूनय थळाव्यांक तातूंत कसलेंच प्राधान्य दिवंक ना अशे आरोप जाताले. पूण होच पेडणें म्हाल हे वेचणुकेंत खांबो कसो भाऊ फाटल्यान उबो रावलो.
मोपा विमानतळ हाडून सगल्यो नोकऱ्यो भायल्यांक दिल्यात. तेच बरोबर जे थळाव्यांनी आपले जागे विमानतळाक दिल्यात तांकां कसलोच मोबदलो मेळूंक ना असो आरोप करून भाजपा आड वावुरपाचो लोकांनी निश्चेव केल्लो. पूण मोपा विमानतळ वाठारांत भाजपान तेंगशी मेळयली.
मोपा वाठारांत जाल्ले 4,886 इतलें मतदान मदीं सगल्यांत चड 3,331 मतां भाजपाक पडलीं. 1357 मतां काँग्रेसीक, 1036 मतां आरजीपीक जाल्यार 108 मतां नोटांक पडलीं.
पूण 2019 वर्साचे तुळेंत मोपा वाठारांत भाजपाच्या मतांनी मात्सो उणाव दिसून आयलो, जाल्यार काँग्रेसीच्या मतां मदीं मात्शी वाड जाली. भाजपाक 2019 वर्सा 4096 मतां पडिल्लीं आनी आतां 2024 वर्सा 3,331 इतलीं मतां पडून भाजपाचे मताधिक्यांत 751 मतांचो उणाव जाला. काँग्रेसीक 2019 वर्सा 1285 इतलीं मतां पडिल्लीं आनी आतां 2024 वर्सा 1357 इतलीं मेळोवन काँग्रेसीन फक्त 72 मतांची वाड नोंद केल्या.
तशेंच धारगळे आयुष होस्पिटल हाडून लेगीत थळाव्यांक नोकऱ्योच ना. थळाव्यांक नोकऱ्यो दिवपाची कबलात खंय गेली अशें म्हणून श्रीपाद भाऊचेर लोक तिडक काडटाले. तरी लेगीत भाजपान धारगळ वाठारांत तेंगशी गांठली. धारगळ वाठारांत 3,414 मतां मदलीं सगल्यांत चड 1,880 मतां भाजपाक पडलीं., 719 इतलीं मतां काँग्रेसीक, 606 इतलीं मतां आरजीपीक पडलीं आनी नोटांक 123 मतां पडली.
पूण 2019 वर्साचे तुळेंत हे वेंचणुकेंत धारगळ वाठारांत भाजप आनी काँग्रेस ह्या दोगांच्याय मताधिक्यांत उणाव दिसून आयलाे. भाजपाक 2019 वर्सा 2709 इतलीं मतां पडिल्लीं आनी आतां 2024 वर्सा 1880 इतलीं मतां पडून भाजपाच्या मताधिक्यांत 829 मतांचो उणाव जाला. काँग्रेसीक 2019 वर्सा 878 इतलीं मतां पडिल्लीं आनी आतां 2024 वर्सा 719 इतलीं मतां मेळोवन काँग्रेसीच्या मतांनी 159 इतलो उणाव जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
