भांगरभूंय | प्रतिनिधी
संगीत तज्ञ नाना आसोलकार हांची मागणी
पेडणेंः कलाकारांचो म्हाल म्हूण पेडणें परिचीत आसा. जायते नामनेचे कलाकार ह्या म्हालांत जल्माक आयले. तांणी आपल्या गांवां वांगडाच राज्याचे तशेंच आंतरराष्ट्रीय पांवड्यार नांव पर्जळीत केले. दरेक घरांत एक तरी कलाकार जल्माक येताच. अशा कलाकारांच्या भूंयेंत रवींद्र भवन उपलब्ध नाशिल्ल्यान तांकां पणजी, मडगांव, सांखळी, फोंड्यां वचून कलेचें प्रदर्शन वा कलेचें प्रशिक्षण घेवचें पडटा. सरकारान पेडणें म्हालांत मध्यवर्ती सुवातेर रवींद्र भवन उबारल्यार ताचो कलाकारांक फायदो जातलो, अशें संगीत तज्ञ नाना आसोलकार हांणी सांगलें.
सांस्कृतीक खात्याचे मंत्री गोविंद गावडे हांणी हाची दखल घेवन पेडण्यां बेगिनांत बेगीन खात्या वतीन रवींद्र भवन उबारचे अशी मागणी आसोलकार हांणी केल्या.
तांबोसे मोपाचे नामनेचे संगीत तज्ञ नाना आसोलकार हांची पेडणें नगराध्यक्ष सिद्धेश पेडणेंकार, उजो पालोवपी दळाचे अधिकारी प्रशांत धारगळकार, हस्तकला म्हामंडळाचे संचालक महादेव गवंडी, नवचेतना युवक संघाचे अध्यक्ष कृष्णा पालयेंकार हांणी भेट घेवन कले विशीं चर्चा केली.
पेडणें म्हालांत हजारांनी कलाकार आसतना तांकां कला भवन उपलब्ध नाशिल्ल्यान नाना आसोलकार हांणी नाराजी उक्तायली.
आतां मेरेन आमदार, मंत्र्यांनी फक्त आस्वासनां दिल्यात. पूण अजुनूय पेडण्यां रवींद्र भवना उबारपी विशीं सरकार दरबारी निर्णय जावंक ना हे विशीं तांणी खंत उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
