भांगरभूंय | प्रतिनिधी
पणजीः पेडणें नीट परिक्षा केंद्रांत अधिकार्यांनी घोळ तयार केला. पक्षपात करून एका वर्गांतले पेपर वेळ सोपचे पयलींच काडून घेतल्यात जाल्यार हेर वर्गांनी ही परिक्षा सुरळीत चालू आशिल्ली. हे विशीं जिल्लोधिकार्यान चवकशी करून संबंधितांचेर कारवाय करची, अशी मागणी एनएसयुआयचे फुडारी कुमार गवळी हांणी केल्या.
एनएसयुआय हांणी पेडणें-विर्नोडांत आशिल्ल्या संत सोहिरोबानाथ आंबिये सरकारी महाविद्यालय परिक्षा केंद्रांतले नीट-युजी परिक्षे वेळार एका कथित घोळाची रोखडीच चवकशी करची अशी मागणी करपी एक निवेदन उत्तर गोंय जिल्लोधिकार्यांक सादर केलें. ह्या वेळार एनएसयुआयचे फुडारी कुमार गवळी, सदाशिव बडिगेर, हर्ष देसाय आनी झैद शेख हजर आशिल्ले.
परिक्षा वर्ग एजी-०७ तल्या सुमार २० उमेदवारांक परिक्षा सोंपपाच्या अधिकृत वेळा पयलीं सुमार १५ मिनटां आदीं पेपर बरोवपाक आडयले आनी तांचे कडल्यान प्रस्नपत्रिका आनी उत्तरपत्रिका जप्त केल्यो, जाल्यार त्याच केंद्रांतल्या हेर वर्गांतल्या उमेदवारांक मात अधिकृत वेळ सोंप मेरेन परिक्षा बरोवपाक दिली, असो आरोप गवळी हांणी केल्या.
जिल्लो प्रशासनान सीसीटीव्ही फुटेज, हाजिरी पट, परिक्षेचे दस्तऐवज आनी पिडेस्त विद्यार्थी तशेंच परिक्षा कर्मचार्यांचे जबाब तपासून ह्या आरोपांची सहानिशी करची. जर हे आरोप खरे थारले, जाल्यार विद्यार्थी स्वतंत्र चवकशी आनी योग्य निवारक उपाय येवजण्यो हातांत घेवच्यो. राश्ट्रीय पांवड्यार जावपी सर्तीचे परिक्षेंत दर एका विद्यार्थ्यांक समान संद मेळपाक जाय. अधिकार्यांनी रोखडींच पावलां उखलचीं आनी पिडेस्त उमेदवारांक न्याय मेळोवन दिवचो, अशी मागणी गवळी हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
