भांगरभूंय | प्रतिनिधी
पेडणें, प्रतिनिधी : उगवें पंचायत वाठारांतले तांबोशेंचे पांडुरंग आसोलकार हांच्या भात शेताची रानदुकरांनी व्हडा प्रमाणांत लुकसाण केलें. हाची कृशी खात्यान दखल घेवन ह्या वाठारांतले शेतीची पळोवणी करून बेगोबेग लुकसाण भरपाय दिवची, अशी मागणी तांणी केल्या.
पेडणें म्हालांतले शेतकार, युवा शेतकार, जाणकार हे शेतांनी वेगवेगळे प्रयोग करून विंगड विंगड तरेचें उत्पन्न घेत आसतात. मात ही भात शेती वा शेतांतल्या उत्पन्नाची रानवटी जनावरां येवन नासाडी करतात. हे इबाडिल्ले शेत जमनीची, बागायतीची कृशी खातें योग्य तरेन दखल घेनाशिल्ल्यान शेतकारांनी तिडक उक्तायल्या.
सध्या रानवटी जनावरां लोक वसणुकेंत घुसून शेतां, बागायतींचो इबाड करतात. बरेच कश्ट करून केल्ली शेती आनी शेतांतलें उत्पन्न खावपा खातीर रानवटी जनावरां शेतांत येवन पिकिल्लें पीक काबार करतात. मात सरकारा वतीन कसलेच तरेची लुकसाण भरपाय मेळना. ताका लागून शेतकार शेत पडींग दवरपाक लागल्यात. सरकारान हाचे कडेन लक्ष दिवन रानवटी जनावरांनी केल्ल्या शेताच्या लुकसाणाची लुकसाण भरपाय दिवपा खातीर यत्न करचे, अशी मागणी सगळ्याक जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
