भांगरभूंय | प्रतिनिधी
अमीत पाटकारः पेडणें मतदारसंघांत हात जोडो मोहिमेक सुरवात
भांगरभूंय । प्रतिनिधी
पेडणें: पेडणें म्हालांतलो रोजगाराचो प्रस्न सोडोवचे आदीं थळावे आमदार महाराष्ट्रांत वचून राजन तेली हांचे प्रस्न सोडोवपाक फुडाकार घेता जाल्यार ही दुर्देवाची गजाल. सगळ्यांत पयलीं पेडणें म्हालांतल्या बेरोजगार तरणाट्यांक संद दिवपाची गरज आसा. आमचे भुरगे मोपा विमानतळाचेर खंय आसात? सुशिक्षीत बेरोजगारांक पूर्व प्रशिक्षण कित्याक दिवंक ना? आमच्या भुरग्यांनी फक्त रस्त्याचेर सान्न मारपाची वा सुरक्षा रक्षकाचें काम करपाचें, असो प्रस्न काँग्रेस प्रदेशाध्यक्ष अमीत पाटकार हांणी उपस्थीत केलो. भाजपा सरकाराक गोंयकारांची किंमत ना, ताका लागून भ्रश्ट सरकाराक आतां सत्ते पासून पयस करपाचो उलो तांणी मारलो.
पेडणें मतदारसंघांत काँग्रेसी वतीन हात जोडो अभियानाची सुरवात 16 मार्चाक पेडणेंचे श्री भगवती देवीक नाल्ल ओंपून केलो. ते उपरांत थळाव्या पत्रकारां कडेन पाटकार उलयताले. ह्या वेळार काँग्रेसीचे म्हणयारे संजय बर्डे, उत्तर गोंय अध्यक्ष विरेश शिरोडकार, काँग्रेस फुडारी जितेंद्र गांवकार आनी हेर कार्यकर्ते हाजीर आशिल्ले.
जुमला सरकार म्हूण भाजपा सरकार नांव जोडटा. लोकसभा वेंचणुकेंत तांकां घरा धाडप योग्य जातलें. म्हारगाय वाडली तरीय भाजपा सरकार आवाज काडिना. गॅस वाडलो तरीय भाजपांतल्यो बायलो रस्त्याचेर देंवनात. नोकऱ्यांचीं आस्वासनां दिवन भाजपा सरकारान तरणाट्यांची फटवणूक केल्या, अशें पाटकार हांणी सांगलें.
पेडणें म्हालांत उदकाची समस्या गंभीर जाल्या. वेंचणुकेच्या दिसांनी उदकाचे टँकर दिवपाची सर्त लागताली. वेंचून आयले उपरांत ते टँकर खंय गेले. उदकाची समस्या सुटावी करपाक भाजपा सरकार पुराय अपेशी थारलां, असो दावो पाटकार हांणी केलो.
मोपा विमानतळाचेर पत्र्याचे शेडींत पुलीस स्टेशन सुरू केलां. तें आयुष हॉस्पिटलाचे इमारतींत स्थलांतरीत करचें, अशी मागणी संजय बर्डे हांणी केली.
अॅड. जितेंद्र गांवकार हांणी सांगलें, मोपा विमानतळाच्या नांवार मुख्यमंत्री डॉ. प्रमोद सावंत, येरादारी मंत्री मॉवीन गुदिन्हो आनी पर्यटन मंत्री रोहन खंवटे हे थळावे आमदार प्रवीण आर्लेकार हांच्या आदारान गोवा मायल्स हाडपाक सोदतात. पेडणेंच्या टॅक्सी वेवसायिकांची येलो ब्लॅक टॅक्सी स्टॅण्डाची मागणी आसा, पूण ते दिवपा खातीर सरकार यत्न करिना. उदक, रोजगार अशे साबार प्रस्न पेडणेंकाराक सतयतात. पेडणेंकारांचे प्रस्न सोडोवपाक जायना जाल्यार आमदार आर्लेकार हांणी राजिनामो दिवचो.
विरेश शिरोडकार हांणीय भाजपा सरकाराचेर खर टिका केली.
भाजपाचो पाडो वाचपाक मोहीम म्हत्वाचीः पाटकार
काँग्रेस फुडारी राहुल गांधी हांणी भारत जोडो अभियना खाला ‘काश्मीर से कन्याकुमारी तक’ असो उपक्रम हातांत घेतिल्लो. ताचोच एक भाग म्हूण हात जोडो अभियान गोंयांत चालू आसा. भाजपा सरकार फाटल्या 9 वर्सां सावन लोकांक फटयता. ताचो पाडो वाचपा खातीर ही मोहीम म्हत्वाची थारता. हे मोहिमेंत लोकांक तांणी दिल्ल्या फटकिऱ्या आस्वासनांची म्हायती दितात, अशें पाटकार हांणी सांगलें.
मोपा विमानतळाक मनोहर नांव दिवन सरकाराक कितें मेळोवचें आशिल्लें? मनोहर पर्रीकार अशें नांव दिवपाक तांकां लज दिसताली काय कितें, असोय प्रस्न अमीत पाटकार हांणी उपस्थीत केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
