पेडणेंकारांक मेळ्ळी 15 वर्सां उपरांत सुस्त न्हीद; दर्यादेगो सामसूम

भांगरभूंय | प्रतिनिधी

पेडणें: दर्यादेग वाठारांतल्या मेकळे सुवातेंत रातच्या 10 उपरांत कसलेय तरेचें संगीत वाजलें जाल्यार थळावे पुलीस अधिकारी, म्हाल उपजिल्होधिकारी हांकां दोशी धरून तांचेर कारवाय करतले, असो आदेश मुंबय उच्च न्यायालयान दिला. ताका लागून पेडणें पुलीस निरिक्षक दत्ताराम रावत हांणी 1 डिसेंबराक सगळ्या शॅक, रॅस्टोरंण्ट, नायट क्लब वेवसायिकांची बसका आपोवन तांकां शिटकावणी दिली. उपरांत रातच्या वेळार मोरजी, हरमल, मांद्रें, केरी ह्या दर्यादेगेंचेर पुलीस बंदोबस्त दवरलो. रातच्या 10 वरां उपरांत एकाद्या शॅकांत, रॅस्टोरंण्टांत, वा नायट क्लबांत आवाजाचें प्रदुशण जालें जाल्यार तांचेर रोखडीच कारवाय करची, अशेय निर्देश पुलिसांक दिले. ताका लागून 15 वर्सांनी दर्यादेग वाठारांत रातच्या 10 वरां उपरांत कसलेच तरेचें संगीत आयकुपाक येवंक ना आनी थळाव्यांक हक्काची सुस्त न्हीद मेळ्ळी.

पर्यटन मोसमांत रातभर संगिताच्या नांवान धुमशेण, रेव्ह पार्ट्यो, मारामारी ह्या सगळ्या प्रकारांक थळावे लोक विटिल्ले. दर्यादेग वाठारांत भाड्यान रावपी पर्यटक तशेंच थळावे लोकूय थंयच्यान पयस वचून रावताले. ह्या संगिताच्या आवाजान जनेलाचीं दारां लेगीत हालतालीं, अशी म्हायती थळाव्या लोकांनी दिली.

हरमलचे उदय वायंगणकार हांणी सांगलें, पर्यटन मोसमांक आवाजाचें प्रदुशण कितल्या प्रमाणांत आसूं येता, हाचो अणभव दर्यादेग वाठारांत रावपी लोकांक नवो न्हय. मात 15 वर्सांनी 1 डिसेंबराक जी सुस्त न्हीद मेळ्ळी, तशी हे आदीं केन्नाच मेळूंक नाशिल्ली. ही अंमलबजावणी पुलिसांनी अशीच चालू दवरची, अशी मागणी तांणी केली.

मोरजीचे सदानंद शेट्ये हांणी प्रतिक्रिया दितना सांगलें, फाटल्या 15 वर्सां सावन मोरजी द्रयादेग वाठारांत धुमशेणां चलतालीं. रातच्या 10 वरांचेर सुरू जाल्ल्यो पार्ट्यो फांतोडे मेरेन चलताल्यो. सगळेच कडेन आवाजाचें प्रदुशण, पार्कींग वेवस्थेचें बारा बिरेस्तार तेरा शुक्रार, येरादारीची कोंयडी, थळाव्यांची न्हीद पेड्डेर, विद्यार्थ्यांच्या अभ्यासांत आडखळ… हाका लागून थळावे लोक बेजार जाल्ले. मात 1 डिसेंबरात राती कडेन कसलेच तरेचें संगीत आयकुपाक येनाशिल्लें. दर्यादेग वाठारांतल्या कांय लोकांनी पर्यटकांक घरां, कुडी भाड्यान दिल्यांत. ते लेगीत आवाजाच्या प्रदुशणाक लागून रोखडेच वताले. अशी शांतताय उरली जाल्यार व्हड प्रमाणांत पर्यटक येवन ह्या वाठारांत रावतले. हाची दखल थळावे पंचायतीन, थळाव्या पुलिसांनी आनी सरकारा वांगडाच थळाव्या लोकप्रतिनिधींनी लेगीत घेवची, अशी मागणी शेट्ये हांणी केली.

मांद्रें मतदारसंघांतल्या मोरजी, मांद्रें, हरमल, केरी, तेरेखोल ह्या दर्यादेग वाठारांतल्या थळाव्यो लोकांनी समाधान उक्तायलें जाल्यार संगीत पार्ट्यो आयोजीत करपी वेवसायिकांनी मात नाराजी उक्तायली.

दर्यादेग वाठारांतल्या एका नायट क्लब वेवसायिकान आपलें नांव उक्तें करचें न्हय हे अटीचेर प्रतिक्रिया दितना सांगलें, नायट पार्ट्यां वरवींच थळाव्या टॅक्सीकारांक, सुपर मार्केट, दुकानकारांक अर्थीक जोड जाताली. अशा पाट्यांचेर बंदी घालून सरकाराक कितें मेळोवपाचें आसा? सरकाराक जर खऱ्यांनीच बेकायदो वेव्हार बंद करपाचे आसा जाल्यार पयलीं मटको, धिरयो, शिंदळकी वेवसाय, तेचवरी पक्षांतर करपी आमदारांचेर नियंत्रण दवरात. सध्याचें सरकार लेगीत बेकायदो तरेन चलता, तोवूय प्रकार बंद करचो, अशी मागणी त्या वेवसायिकान केली. सरकारान हे आदींच ही कारवाय केल्ली जाल्यार न्यायालयाक आदेश दिवचो पडचो नाशिल्लो, अशें संदेश शेटगांवकार हांणी म्हणलें.

बासरी लेगीत मोनेळ घालपाक शकताः चौधरी

फक्त आवाज प्रदुशण बंद करून पर्यटन मोसम जाग्यार पडचो ना. पर्यावरणाचें लुकसाण जावचें ना, कोयर मुक्त वाठार आसलो आनी सगळ्यांक आस्पावन घेवपी वेवसाय जाता जाल्यारूच पर्यटनाक मजत जातली. फक्त धुमशेणां, ड्रग्ज पार्ट्यो, संगीत पार्ट्यो आनी व्हडा व्हडान कान भेरोवपी संगीत पार्ट्यांचें आयोजन करप म्हणल्यार पर्टयन न्हय. एकादी बासरीची सुरावट लेगीत संगिताची आवड आशिल्ल्या पर्टयकाक नाचोवपाक शकता, अशें अविनाश चौधरी हांणी सांगलें.

मोहीम सासणा खातीर चलचीः फर्नांडीस

फाटलीं 10- 12 वर्सां दर्यादेग वाठारांत आवाज प्रदुशण करपी पार्ट्यो चलताल्यो. त्यो पार्ट्यो फक्त एक दीस बंद करून चलच्यो ना. ही मोहीम सासणा खातीर चलपाक जाय. जे कायदो मोडटात तांचेर कारवाय करपाक जाय, अशें मोरजेची थळावी महिला मारिया गिल्बर्ट फर्नांडीस हांणी प्रतिक्रिया दितना सांगलें.