भांगरभूंय | प्रतिनिधी
छत्रपती संभाजीनगर, खबरां संस्था: मोबायल वापरतना काळजी घेवंक ना जाल्यार व्हड अपघात घडपाक शकता. गाडी चलयतना मोबायलाचेर उलोवचें न्हय, पेट्रोल पंपार मोबायलार उलोवचें न्हय, ह्या दोनूय गजालींची जर जतनाय घेवंक ना जाल्यार व्हड अपघात, दुर्घटना घडपाक शकता. छत्रपती संभाजीनगर शारांत अशीच एक घडणूक घडली. एक दुचाकी चालक पेट्रोल भरपाक पेट्रोल पंपार गेलो. तेन्नाच ताच्या मोबायलाचेर रींग वाजली. ताका लागून दुचाकीक उजो पेटपाक लागलो. कांय वेळार उदक मारून तो उजो पालयलो आनी व्हड घडणूक जावचे पसून वाटवली.
मेळिल्ले म्हायती प्रमाण, वाळूज वाठारांतल्या बजाज ऑटो गेट मुखारच्या पेट्रोल पंपार दुचाकींत पेट्रोल भरपाक एकलो आयिल्लो. तेन्ना अचकीत ताच्या मोबायलाचेर एक कॉल आयलो. ताका लागून रींग वाजली. तो पॅट्रोल भरपाक रांकेंत उबो आशिल्लो. तेन्ना ताचे दुचाकीक अचकीत उजो पेटलो. मात रोखडोच उजो पालयल्ल्यान व्हड घडणूक जावपा पसून वाटवली. गाडयेक अचकीत उजो लागिल्ल्यान पॅट्रोलपंपाच्या कर्मचार्यांची धांवपळ जाली. तांणी ती दुचाकी पॅट्रोल पंपा पसून पयस व्हरून तिका पेटिल्लो उजो पालयलो.
कित्याक उलोवप ना?
पेट्रोल पंपाचेर कोण फोनाचेर उलयता जाल्यार थंयचे कर्मचारी रोखडेंच फोन दवरपाक सांगतात. तशेंच पेट्रोल पंपांचेर लोकांनी धुमशेण कांडचें न्हय वा मोबायल वापरचो न्हय अशी शिटकावणी दिवपी बोर्ड आसात. पेट्रोल पंपार मोबायल फोन वापरचो न्हय हाचें कारण म्हळ्यार इलेक्ट्रोमॅग्नेटिक रेडिएशन. ताका लागून पेट्रोलाची जी वाफ येता ती पेट घेता. तशेंच लागसारच्या धातूच्या वस्तूंत प्रवाह निर्माण करपाक शकता. हाका लागून पेट्रोल पंपांचेर मोबायल फोन वापरूंक मेळना.
कितलें अंतर आसूंक जाय?
मोबायल फोन पेट्रोल पंपा पसून ६ मिटर अंतराचेर दवरचो. पेट्रोल भरून पेट्रोल पंप सोडल्या उपरांत फोन वापरूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
