भांगरभूंय | प्रतिनिधी
रान खात्यान दोगांक घेतले ताब्यांत; 80 कील मास आनी रिक्षा जप्त
फोंडें: मंगळारा सकाळीं पेटकें-धारबांदोड्यां व्हड प्रमाणांत दुकरांची कत्तल करीत आशिल्ल्याचें थळाव्या तरणाट्यांनी उक्तडार हाडलें. रान खात्यान सुमार 80 कील मास आनी एक रिक्षा जप्त केल्या. तेच बरोबर बसावा दोडामणी आनी मंजुनाथ दोडामणी (तिस्क उसगांव, मूळ हुबळी) हांकां ताब्यांत घेवन तांची चवकशी सुरू केल्या. जप्त केल्ल्या मासाचें आनी जिते आशिल्ल्या दुकरांचे नमुने तपासणे खातीर प्रयोग शाळेंत धाडल्यात. आंध्र प्रदेशांतल्यान आयात करतल्या दुकरांची बेकायदो कत्तल करून मास रानवटी म्हूण फोंडें, मडगांव, वाळपय आनी हेर बाजारांनी 500 ते 700 रुपया कील प्रमाण विकताले.
राष्ट्रीय म्हामार्गाचे कुशीक उक्तडार दुकरांची कत्तल करून मास विवीध सुवातांनी धाडून दिताले. थळाव्या तरणाट्यांक हाची सुलूस लागिल्ल्यान पाळो दवरून मंगळारा सकाळीं हो प्रकार उक्तडार हाडलो. वाठारांत बेकायदो दुकरांची कत्तल सुरू आशिल्ल्याची म्हायती तरणाट्यांनी पंच वांगडी महेश नायक आनी सरपंच बालाजी गांवस हांकां दिली. सरपंचान रान अधिकाऱ्यांक म्हायती दिले उपरांत रान अधिकारी आनंद जाधव, नारायण प्रभुदेसाय, विस्वास चोडणकार आनी हेर अधिकाऱ्यांनी घडणूक थळार वचून पंचनामो केलो.
ह्या वेळार 4 दुकरांची कत्तल केले उपरांत मासाचें वजन करून प्लास्टीक पोतयांनी भरिल्ले स्थितींत दिसून आयलें. सुमार 80 कील मास रान अधिकाऱ्यांनी जप्त करून नमुने प्रयोगशाळेंत धाडून दिल्यात. कत्तल केल्ले दुकर रानवटी काय पोशिल्ले हाचो अहवाल मेळ्ळे उपरांतूच स्पश्ट जातलें.
फोंडें, मडगांव आनी हेर वाठारांतल्या बाजारांनी फाटल्या कांय म्हयन्यां सावन गुपीतपणान 500 ते 700 रुपया मोलान रानवटी मास म्हूण विकताले. हें मास पेटकें-धारबांदोडें सावन पुरवण करीत आशिल्ल्याचें चवकशेंत स्पश्ट जालां. ताका लागून गोंयांत आंध्र प्रदेश हांगासरल्या फार्मांतल्यान पोशिल्ले दुकर हांगा हाडून कत्तल करून रानवटी दुकराचें मास म्हूण विकत आशिल्ल्याचो दुबाव आसा.
ताब्यांत घेतिल्ले दोगूय जाण हाचे पयलीं वाठारांत कावला अड्ड्याचेर काम करताले. पूण दुकरांची कत्तल करून ताचे ल्हान ल्हान तुकडे करून दिवपा खातीर कामगारांक दिसपट्टे 800 रुपया मेळटाले. वाठारांत फाटल्या दोन-तीन वर्सां पसून उक्तडार कत्तल करीत आशिल्ल्याचें चवकशेंत उक्तडार आयलां.
कुळें रान विभागाचे अधिकारी नारायण प्रभुदेसा हांणी जप्त केल्लें मास रानवटी काय पोशिल्ल्या दुकरांचें हाची तपासणी करपा खातीर नमुने प्रयोगशाळेंत धाडून दिल्यात. ह्या प्रकरणांत दोगांक ताब्यांत घेतल्यात. ताब्यांत घेतिल्ले जिते 14 दुकर बोंडला प्राणी संग्रहालयांत धाडून दिल्यात. कत्तल करतल्या सुवातेच्या धनयाची लेगीत चवकशी करतले अशें रान अधिकाऱ्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
