भांगरभूंय | प्रतिनिधी
पणजीः अयोग्य वीज बिलांचो निशेध करपा खातीर आमच्या पेज आंदोलनाक सरकार भियेलें. वीज बिलां वाडिल्ल्यान येवपी विधानसभा वेंचणुकेचेर परिणाम जावं येता हें भाजपाक कळ्ळां. हाका लागून सरकारान स्मार्ट मीटर स्थगीत करपाचो आनी अतिरिक्त भाराचेर शुल्क माफ करपाचो निर्णय घेतला अशें अमित पालेकार हांणी सांगलें. शेनवारा पणजेंत जाल्ले पत्रकार परिशदेंत ते उलयताले. ह्या वेळार योगेश गोवेकार, गजानन तिळवे आनी हेर हाजीर आशिल्ले. ह्या वेळार हाजीर आशिल्ल्यांनी मणगणे खावन उमेद मनयली.
पालेकार हांणी सांगलें, अतिरिक्त भार वापरिल्यान खात्यान दंडात्मक शुल्क लायिल्लें. हाका लागून सदचे परस पांच पटींनी वीज बिलां चड आयिल्लीं. एका गिरायकाक 800 वेल्यान सरळ 5 हजार रुपया बिल आयलें. दंड लावचे पयलीं खात्यान गिरायकांक कल्पना दिवपाक जाय आशिल्ली. हाचे आड आमी केल्ल्या पेज आंदोलनाक राज्यभरांतल्यान बरो प्रतिसाद मेळ्ळो. हाका भियूनूच सरकारान हो निर्णय फाटीं घेतलो.
भाजपाच्या अत्याचाराचेर मात करपाक जाय जाल्यार लोकांनी भायर सरपाची गरज आसा. लोकांच्यो मुळाव्यो गरज्यो भागोवपा खातीर भाजपाक सत्ते भायर काडपाची गरज आसा.
योगेश गोवेकार हांणी म्हणलें, अन्याया आड एकठांय येवन रस्त्यार देंवल्यार कितें जाता हें आयज सगळ्यांक कळ्ळां. आमच्या आंदोलनाक लागून सरकाराक एक पावल फाटीं घेवचें पडलां. आमदार जावपाचें सपन आमी पळयनात. आमी फकत लोकांचे प्रस्न मांडटात. बहुजन समाज पक्षाक आपलो घरचो पक्ष मानपी लोकांनी आपल्या फुडाराच्या राजकी कारकिर्दीचो विचार करचो. 2027 वर्सा भाजपा सरकार परतून सत्तेर आयलो जाल्यार गोंयकांरांकपेज, मणगणे लेगीत खावपाक मेळचे ना हें लक्षांत दवरपाक जाय.
गजानन तिळवे हांणी सांगलें, आमचे पेज आंदोलन येसस्वी जालें. आमकां तेंको दिवपी सगळ्यांचे आमी उपकार मानतात. स्मार्ट मीटर स्थगीत केल्ल्यान मंत्री सुदीन ढवळीकार निराश जाल्यात. आमी तांकां लेगीत हांगा येवन मणगणे खावपाचे आमंत्रण दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
