भांगरभूंय | प्रतिनिधी
आंतरराष्ट्रीय बाजारांत कच्च्या तेलाच्या दरांत वाड जाल्ल्यान देशांतल्या दरांचेरूय परिणाम जावपाक लागला. तेल मंत्रालयाच्या पॅत्राॅलियम नियोजन आनी विश्लेशण कोशान 2023 वर्सा जाहीर केल्ल्या आंकड्यां प्रमाण भारत कच्च्या आयात तेलाचेर आदारून आसा. 2022-23 वर्सा भारताचे आयात तेलाचें प्रमाण 87.3 टक्के आसा, जाल्यार 2021-22 वर्सा 85.5 टक्के आशिल्ले. अशे परिस्थितींत भारतांत पॅत्राॅल आनी डिझेलाचे पर्यायी स्त्रोत सोदपाक लागल्यात.
मुंबय, चेन्नय, कोलकाता सयत कांय शारांनी पॅत्राॅलान शंबराचो आंकडो हुंपला. सध्या मुंबयंत पॅत्राॅल आनी डिझेलाचे दर अनुक्रमान 106.31 रुपया आनी 94.27 दर लिटर आसा. इंधनाच्या दरांत वाड जाल्ल्यान म्हारगाय वाडल्या. वर्ल्ड ऑफ स्टॅटिस्टिक्स ट्विटर अकाउंटान दिल्ले म्हायती प्रमाण भारतांत 16 मार्चाक पॅत्राॅलाचो दर 97.00 रुपया दर लिटराक आशिल्लो. जाल्यार अमेरिकेंत 78.09 रुपया आशिल्लें. ते भायर पाकिस्तानांत 81.38 रुपया जाल्यार चीनांत 78.09 रुपया आशिल्लो. हे आंकडेवारी प्रमाण अमेरिकेंत आनी चीनांत पॅत्राॅलाचे दर सारकेंच आसात.
सगळ्यांत सवाय पॅत्राॅल
1) संवसारांतलें सगळ्यांत सवाय पॅत्राॅल व्हॅनेझुएलात मेळटा. हांगा पॅत्राॅलाचें दर 1 रुपया 64 पयशे म्हळ्यार दर लिटराक 0.02 अमेरिकन डॉलर आसा. देखून हांगा पॅत्राॅल उदका परस उण्या दरात मेळटा. भारता परस हें दर 99 पटींनी उणें आसा.
2) हाचे उपरांत सवाय दरांत पॅत्राॅल मेळपी देशांमदीं कुवेताचो दुसरो क्रमांक आसा. कुवेतांत पॅत्राॅलाचो दर 23 रुपया 02 पयशे म्हळ्यार 0.28 डॉलर दर लिटराक मेळटा.
3) सगळ्यांत सवाय पॅत्राॅल आशिल्ल्या देशांच्या वळेरेंत इथिओपिया तिसऱ्या क्रमांकाचेर आसा. इथिओपियांत पॅत्राॅलाचें दर 28.13 रुपया म्हळ्यार दर लिटराक 0.22 डॉलर आसा.
4) हाचे उपरांत इराणांत एक लिटर पॅत्राॅलाचो दर 29.59 रुपया म्हळ्यार 0. 36 डॉलर, नायजेरियांत 46.86 रुपया म्हळ्यार 0.57 डॉलर, साउदी अरेबिया 50.97 म्हळ्यार 0.62 डॉलर, रशिया 51.79 रुपया म्हळ्यार 0.63 डॉलर आसा. हाचे भायर इंडोनेशियांत एक लिटर पॅत्राॅलाचें मोल 55.08 रुपया म्हळ्यार 0.67 डॉलर, युएईंत 64.94 रुपया म्हळ्यार 0.79 डॉलर आनी अर्जेटिनांत 65.73 रुपया म्हळ्यार 0.8 डॉलर इतले आसा.
सगळ्यांत म्हारग पॅत्राॅल
1) वर्ल्ड ऑफ स्टॅटिस्टिक्स ट्विटराच्या आंकडेवारी प्रमाण संवसारांत सगळ्यांत चड म्हारग पॅत्राॅल लेबनॉनांत मेळटा. हांगा दर लिटराक पॅत्राॅलाचें दर 502.26 पयशे म्हळ्यार 6.11 अमेरिकन डॉलर आसा.
2) म्हारग पॅत्राॅल मेळपी हाँगकाँग हो संवसारांत दुसरे क्रमांकाचेर आसा. हाँगकाँगात एक लिटर पॅत्राॅलाचो दर 243.32 पयशे म्हळ्यार 2.96 अमेरिकन डॉलर आसा.
3) ताचे उपरांत सगळ्यांत चड म्हारग पॅत्राॅल मेळपी देशां मदीं सिंगापूर तिसऱ्या क्रमांकाचेर आसा. सिंगापूरांत दर एक लिटर पॅत्राॅला खातीर 225.24 रुपया म्हळ्यार 2.74 अमेरिकन डॉलर फारीक करचे पडटात.
4) आइसलॅण्ंडात एक लिटर पॅत्राॅल 196 रुपया 47 पयशे म्हळ्यार 2.39 डॉलर दर लिटराक मेळटात. ते उपरांत डेन्मार्कांत 189 रुपया 07 पयशे म्हळ्यार 2.3 डॉलर, फ्रांन्सांत 180 रुपया 86 पयशे म्हळ्यार 2.2 डॉलर, इटलींत 177 रुपया 56 पयशे म्हळ्यार 2.16 डॉलर, नेदरलँड्स 177.56 रुपया म्हळ्यार 2.15 डॉलर इतले आसात.
5) हाचे उपरांत फिनलंडांत एक लिटर पॅत्राॅलाचें दर 176 रुपया 74 पयशे म्हळ्यार 2.15 डॉलर आसा. जाल्यार ग्रीसांत 175 रुपया 09 पयशे म्हळ्यार 2.13 डॉलर, नॉर्वेत एक लिटर पॅत्राॅलाचें दर 175 रुपया 09 पयशे म्हळ्यार 2.13 डॉलर आनी जर्मनींत 166 रुपया 05 पयशे म्हळ्यार 2.02 डॉलर आसा.
यूकेंत एक लिटर पॅत्राॅलाचे दर 150 रुपया 43 पयशे म्हळ्यार 1.83 डॉलर आसा. ऑस्ट्रेलियांत एक लिटर पॅत्राॅलाचे दर 104 रुपया 40 पयशे म्हळ्यार 1.27 डॉलर आसा. जाल्यार जपान, दक्षिण आफ्रिका, दक्षिण कोरिया हांगा दर लिटराक पॅत्राॅलाचे दर अनुक्रमान 103 रुपया 58 पयशे म्हळ्यार 1.26 डॉलर, 102 रुपया 75 पयशे म्हळ्यार 1.25 डॉलर आनी 101 रुपया 93 पयशे म्हळ्यार 1.24 डॉलर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
