भांगरभूंय | प्रतिनिधी
राष्ट्रीय उद्यान – टॉर्नगॅट मावंटन्स नॅशनल पार्क लॅबराडॉर प्रांतांत येता. एटलांटीक कॅनडांतलें हें सगळ्यांत व्हडलें राष्ट्रीय उद्यान. ताचे उपरांत, न्यूफावंडलॅण्ड प्रांताचे पश्चिमी तटार ग्रोस मॉर्न नॅशनल पार्क हें राष्ट्रीय उद्यान आसा. 1987 वर्सा, ताका युनॅस्कोन संवसारीक दायज सुवातीचो दर्जो दिला. ह्या राष्ट्रीय उद्यानांचे भितरले वाठार पळोवपा खातीर दर दिसा हायकींग भोंवडी जाता. आँटॅरियो प्रांतांत येवपी ‘क्वीन विक्टोरिया पार्क’ पूर्व कॅनडांत खूब फामाद आसा. ह्या उद्यानांतल्यान नायाग्रा फॉल्स पळोवं येता. तशेंच उदका संबंदीत खेळ ह्या उद्यानांत उपलब्द आसात.
तळी – कॅनडांत ल्हान-व्हड अश्यो सुमार 2 मिलियन तळयो आसात. ‘लेक सुपिरियर’ ही तळी मध्य उत्तर अमेरिकेंत येता आनी तळ क्षेत्रफळाचे बाबतींत संवसारांतली सगळ्यांत व्हडली तळी थरल्या. हे तळयेचें तळ क्षेत्रफळ 82,100 चौखण किलो मिटर आसा. ताचे उत्तरेक आनी पुर्वेक पूर्व कॅनडांतलो आँटॅरियो प्रांत आनी पश्चिमेक यू.एस. चो मिनेसोटा प्रांत येता. आँटॅरियो प्रांताक तेंकून ‘लेक ह्युरोन’ ही तळी आसा. ताचें तळ क्षेत्रफळ 59,600 चौखण किलो मिटर आसा. ‘लेक इयरी’, ‘लेक आँटॅरियो’, ‘लेक निपिगॉन’ ह्यो हेर तळयो आँटॅरियो प्रांतांत येतात. हाचे भायर, कबॅक प्रांतांत ‘कनायपिस्का रॅजवार’ धरून तिसेक जलसंचय आनी तळयो आसात.
आयस हॉकी – खेळप आनी रिकामी वेळांत आराम करप हे कॅनडाच्या लोकांक खूब आवडटा. कॅनडाच्या लोकांचो आवडटो खेळ म्हणल्यार आयस हॉकी. बर्फांतलो हो खेळ हजारांनी लोकां मदीं प्रसिद्ध आसा. ह्या खेळांत बॉलाच्या बदलाक एक घट्ट रबर डिस्क म्हणल्यार ‘पक’ वापरतात. 2014 शिंयाळी ऑलिम्पीक सर्तींत कॅनडाच्या दादल्यां आनी बायलां पंगडाक भांगरा पदक फावो जाल्लें.
मेपल सिरप – कबॅक आनी आँटॅरियो प्रांतांनी रंगबिरंगी मेपल झाडां आसात. ह्या झाडाच्या दिखा पसून मेपल सिरप तयार करतात. कॅनडाच्या कबॅक प्रांतांत सगळ्यांत चड मेपल सिरपाचें उत्पादन जाता. ह्या सिरपाक संवसारभर मागणी आशिल्ल्यान ताची निर्यात जाता. जर्मनी, ब्रिटन, जपान सारकिल्या देशांनी ह्या सिरपाची चड मागणी आसा. पॅनकेक, वॉफल, फ्रँच टोस्ट ह्या पदार्थां खातीर ताचो चड वापर जाता. मेपल झाडाचें पान कॅनडाचें राष्ट्रीय चिन्न आनी तें कॅनडाच्या राष्ट्रीय ध्वजार लेगीत दिसता.
नुस्तेमारी – नुस्तेमारी हो कॅनडांतलो मुखेल उद्देग. दर्या तशेंच तळयांनी मेळपी नुस्त्यांचेर कॅनडांतलो नुस्तेमारी उद्देग चलता. कनॅडाचे भोंवतणी एटलांटीक, पॅसेफीक आनी आर्क्टीक म्हासागर आसात. ताका लागून, नुस्तें आनी नुस्त्याचीं खाणां-जेवणां ह्या वाठारांत मोट्या प्रमाणांत मेळटात. एटलांटीक कॅनडांतले प्रांत नुस्तेमारी वेवसायाचेर निंबून आसात. कॅनडाच्यान नुस्तेमारी उत्पाद युनायटेड स्टेट्स, चीन, युरोपी संघ, जपान, हाँग काँग ह्या देशांनी वता.
खाणां-जेवणां – कॅनडाचीं खाणां-जेवणां वेग-वेगळ्या प्रांता प्रमाण वांटून गेल्यात. कॅनडांत सुरवातीच्या काळांत इंग्लीश, स्कॉटीश आनी फ्रँच खाणांचो प्रभाव दिसतालो. फ्रँच कनॅडियन खाणां-जेवणांचें कबॅक्वाज आनी अकेडीयन अशें विभाजन जाता. कॅनडांतले लोक नुस्तें, बीफ हाचे सयत गोड पदार्थ खूब खातात. कॅनडांतलीं कांय लोकप्रिय खाणां-जेवणां अशीं आसात – ब्लूबॅरी ग्रण्ट (जॅमा वरी), सिनामन रोल्स, डल्स (सीवीड), पुटीन, बॅनक (ब्रॅड), न्यूफी फ्रायज, स्टीम्ड फिडलहेड्स, लॉबस्टर रोल्स, टोटियार.
स्नेहा सबनीस
9923633789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
