भांगरभूंय | प्रतिनिधी
पणजीः गोंयचे मुख्यमंत्री डॉ. प्रमोद सावंत हांच्या सुरक्षा ताफ्याक आशिल्ली बोलेरो गाडयेक भिरांकूळ धपको लागपाचो टळ्ळो. मुख्यमंत्र्याच्या ड्रायव्हराच्या सादूरपणाक लागून व्हडलो अपघात जावपा पसून उरलो. ह्या प्रकरणांत आनीक एक धक्को दिवपी म्हायती उजवाडाक आयल्या बोलेरो गाडयेचो ड्रायव्हर समीर फडते हो पुलीस हवालदार आशिल्ल्याचें उक्तें जालां. ह्या प्रकरणांत दिवचल पुलिसांनी हवालदारा सयत वट्ट 6 जाणांक ताब्यात घेतल्यांत.
मेळिल्ले म्हायती प्रमाण, मुख्यमंत्री डॉ. सावंत हांचो ताफो आमोणा सावन वता आसतना मुखारच्यान येवपी एके बोलेरो गाडयेचे नियंत्रण सुटले तेन्ना गाडी सरळ ताफ्याक धपको दिता आसली पूण मुख्यमंत्र्यांच्या ड्रायव्हरान बेगीन गाडी कुशीक वळयली आनी व्हडलो अपघात जावपा पसून उरलो. सुरक्षा रक्षकांनी रोखडीच बोलेरो गाडी थांबयली आनी तपासली तेन्ना तातूंतले सगळे जाण सोरो पियेल्लें आशिल्ल्याचें दिसून आयलें. विशेश म्हळ्यार अपघात जाल्ल्याचें पळोवन दुबावीत समीर फडते हांणी पळ काडलो.
सुरक्षा दळान रोखडेंच गाडयेंतल्या हेर दुबावितांक ताब्यांत घेतले, जाल्यार फरारी आशिल्लो हवालदार समीर फडतो हाकाय काल पुलिसांनी सोदून ताब्यांत घेतलो. आतां मेरेन पुलिसांनी समीर फडते, साईश रायकार, विराज राऊत, पलाश जल्मी, पांडुरंग मोपकार आनी राजू सावंत (सगले रावपी कुंभारजुवें) हांकां ताब्यांत घेतल्यांत. दिवचल पुलिसांनी गाडी जप्त करून दुबावितां आड गुन्यांव नोंद केला. पुलीस फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
