भांगरभूंय | प्रतिनिधी
पणजी : तीन वर्सां वा ते परस चड काळ एकाच पुलीस स्टेशनाचेर आशिल्ल्या पुलीस निरीक्षकांच्यो येवपी तीन ते चार दिसांनी बदल्यो जातल्यो. तशेंच ह्यान फुडें निरीक्षकांक आपल्या पुलीस स्टेशन वाठारांत रावप सक्तीचें जातलें, अशें मुख्यमंत्री डॉ. प्रमोद सावंत हांणी सांगलें.
मुख्यमंत्री आयतारा जाल्ले पत्रकार परिशदेंत उलयताले. ह्या वेळार तांणी, राज्यांतल्या कांय पुलीस स्टेशनांनी जायत्या वर्सां सावन एकूच निरीक्षक आसा. अश्या सगळ्या निरीक्षकांच्यो बदल्यो जातल्यो. ह्यान फुडें आपापल्या वाठारांतल्या गुन्यांवकारी घडणुकांचेर नदर दवरपाक निरीक्षकांक त्याच वाठारांत रावचें पडटलें.
निरीक्षक, उपनिरीक्षक तशेंच कॉन्स्टेबल ह्या पदांवेल्या पुलिसांच्यो सेगीत बदल्यो करतले. तशेंच राज्यांतल्या २० टक्के पुलिसांक रातचे पाळयेर दवरपाचो निर्णय गृह खात्याच्या बसकेंत घेतिल्ल्याचें तांणी सांगलें.
मुख्यमंत्र्यांनी, देश-विदेशांतले घुवळे वखदांचे तस्करी गोंयांक लक्ष करतात. तांचेर घुवळे वखदां विरोधी पंगड तशेंच क्रायम ब्रांच लक्ष दवरून आसा. गुन्यांवकारी मळार आशिल्ल्या कांय जाणांक गोंयच्यान कायमचे धांवडायतले. तशेंच कर भरिनासतना रस्त्या कुशीक बसून वेवसाय करप्यांचेरूय थंयच्यान काडपाचो निर्णय घेतला अशेंय तांणी नमूद केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
