भांगरभूंय | प्रतिनिधी
मडगांव: राज्यांतल्या पुलीस दळांत राजकी हस्तक्षेप व्हडा प्रमाणांत वाडला, तपास प्रक्रियेंत फुडार्यांचें चेंपण हाडप स्पश्टपणान दिसता. हें चालू उरल्यार संरक्षणा खातीर सामान्य मनशाक कायदो हातांत घेवचो पडटलो अशी भिरांत आमदार विजय सरदेसाय हांणी उक्तायल्या.
राज्यांत वाडत वचपी गुन्यांवांची आंकडेवारी विशीं टिप्पणी करतना सरदेसाय हांणी सांगलें, सरकार आपली जापसालदारकी टाळपा खातीर अहवाल आनी आंकडेवारी चुकीची आसा असो दावो सदांच करता. बेकारीच्या बाबतींत लेगीत सरकारान केंद्रीय अहवाल न्हयकारिल्लो, ही एक पोरणी संवय. फातोड्ड्यां मतदारसंघांत बेकायदेशीर वावर आनी मिनी कॅसिनो चालू आसात आनी स्वतंत्र पुलीस निरिक्षकांची मागणी करून लेगीत सरकार मुद्दाम ताचे कडेन आडनदर करता. हें सगळें फकत ‘हप्तेखोरी’ चालू दवरपा खातीर करतात असो आरोप तांणी केलो.
काशिनाथ शेट्ये हांचेवेल्या हल्ल्याचो संदर्भ दीत सरदेसाय हांणी म्हणले, ज्या प्रकरणांत उच्च न्यायालय नियंत्रण दवरता त्याच प्रकरणांत कागाळदाराचेर हल्लो जाता आनी ताचे बदला ताचेरुच गुन्यांव नोंद जातात, हें लोकशायेचें न्हय तर ‘जंगल राज’चें लक्षण. पुलिसांक संरक्षण दिवंक मेळना जाल्यार एक वेळ येवंक शकता की लोकांक स्वताचे सुरक्षे खातीर बोल्सांनी शस्त्रां दवरचीं पडटलीं.
राज्यांत गुन्यांव वाडपाची वास्तवताय सरकारान मान्य करून, उत्तर प्रदेश वा बिहारा कडेन तुळा करचे परस पुर्तुगाला सारकिल्ल्या विकसीत प्रदेशां कडेन राज्याची तुळा करची. तशेंच सुदारपा खातीर पावलां उबारचीं असोय सल्लो तांणी ह्या वेळार दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
