भांगरभूंय | प्रतिनिधी
पणजी, प्रतिनिधी ः पुराय गोंयभर पर्यटकांक आनी गोंया भायल्या गाडयांक आडोवन येरादारी पोलिसां कडल्यांन तांची पिडणूक चल्ल्या. लिपून रावून मदींच तांका आडावप हें सामकें धोक्याचें जावन आसा. मुख्यमंत्र्यान दिल्लें निर्देश फाट्यार मारून पुलीस तालांव मारतात, असो आरोप आम आदमी पक्षाचो गोंय संयोजक अमित पालेकार हांणी केलो.
‘एक्स’वरवीं येरादारी पुलिसां कडल्यांन तालांव मारपाच्या प्रकाराचेर कमेंट करतना अमित पालेकार हांणी म्हणलां, येरादारी पुलिसां कडल्यान पर्यटकांची तशेंच गोंया भायल्या गाडयांची छळणूक करपाच्या प्रकारांत बरीच वाड जाल्या आनी हो प्रकार पुराय गोंयभर पळोवपाक मेळटा.
पर्यटकांक धरपा खातीर कोनश्यांनी लिपून रावून तांका मदींच आडावप ही गजाल गंभीरच न्हय तर जीव व्हगडावपाचो प्रकार. फाटलें दिसा हांव चोर्ला सावन येतालों, तेन्ना हांव पळयलें की गोंयांत येवपी आनी गोंया भायर वचपी दरेक पर्यटकांक आडायताले आनी जे भशेन ते पुलिसांचे हात पाय पडटाले तेन्ना तांकां कसले त्रास जातात हें स्पश्ट दिसून येताले, असो आरोप पालेकार हांणी केलो.
म्हारगाय बरीच वाडत आसा आनी लोकांक पगारय पावना. तरी लेगीत वेळा वेळार मुख्यमंत्री, पर्यटन मंत्री आनी गोंय पुलीस महासंचालका कडल्यान निर्देश येवन लेगीत येरादारी पुलीस हे तिगांकूय फाट्यार मारून पर्यटकांक पिडत आसात, असोय आरोप पालेकार हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
