भांगरभूंय | प्रतिनिधी
गुन्यांव नोंद जाले उपरांत पयलेच खेप दिली प्रतिक्रिया
भांगरभूंय। प्रतिनिधी
पणजी : आपयता तेन्ना हाजेरी लावपा सयत पुलिसांक हांव तपासांत पुर्ण सहकार्य करतां, अशें प्रा. सुभाष वेलींगकार हांणी दिवचल पुलीस स्टेशनाचेर हाजेरी लायले उपरांत सांगलें. सेंट फ्रान्सीस झेवीयर हांचे कुडी विशीं वादग्रस्त विधान केले उपरांत पयलेच खेपो तांणी प्रतिक्रिया उक्तायली.
म्हजे कडेन जी म्हायती आशिल्ली ती सगळी म्हायती हांवें पुलिसांक दिल्या. ते आपयतात ते प्रमाण हांव हाजेरी लायतलो. धर्मीक भावना दुखावल्या प्रकरणां मात तांणी उलोवपाक न्हयकार दिलो. हो मुद्दो न्यायप्रवीश्ट आसा, अशें तांणी सांगलें.
सेंट फ्रान्सीस झेवीयर हांचे कुडीची डीएनए चांचणी करची अशी मागणी प्रा. वेलींगकार हांणी केल्ली. तांचे हे मागणे उपरांत झेवीयराक मानपी सगल्या धर्माच्या लोकांच्यो भावना दुखावल्ल्यो. तांणी तांच्या अटकेची मागणी केल्ली. पुलिसांनी तांचे आड गुन्याव नोंद केलो. पूण ते बरेच दीस पुलिसांक सांपडूंक नात. गुन्यांव नोंद जाले उपरांत अटकपूर्व जामिना खातीर तांणी उत्तर गोंय जिल्हो आनी सत्र न्यायालयात अर्ज केलो. हो अर्ज भायरायल्या उपरांत तांणी उच्च न्यायालयात जामिना खातीर अर्ज केलो. उच्च न्यायालयात अर्जाचेर सुनावणी सुरू आसा. आता 15 ऑक्टोबराक सुनावणी जातली. न्यायालयाच्या आदेशा प्रमाण पुलिसांचे नोटिशीक पालव दित तांणी दिवचल पुलीस स्टेशनाचेर हाजेरी लायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
