भांगरभूंय | प्रतिनिधी
माशेल, प्रतिनिधी: बाणस्तारी पुर्तुगेज काळा सावन भरपी चवथिचो बाजार अंदूं आयज ४ सप्टेंबराक भरला. हो बाजार ५ सप्टेंबराकूय आसतलो. तेन्ना वेपारी आनी बाजाराक येवपी गिरायकांनी सहकार्य करचें, असो उलो ह्या बाजाराची म्हायती दितना भोम अडकोणचे सरपंच दामोदर नायक हांणी मारलो. ह्या वेळार पंचायत वांगडी तशेंच आदले सरपंच सुनील भोमकार, आजम खान हजर आशिल्ले.
गोंय, कर्नाटक तशेंच महाराष्ट्रांतले वेपारी हांगा फाटल्या कितल्याशाच वर्सां सावन चवथीचें सामान विकपा खातीर येतात. चवथीक लागपी सामान घेवपा खातीर गोंयच्या खाची- कोनशाच्यान लोक ह्या बाजाराक भेट दितात. ताका लागून गोंयांत फामाद आशिल्ल्या ह्या बाजाराची ‘चवथीचो बाजार’ म्हणून एक नामना आसा.
आदीं बाजारांतली सुवात ह्या बाजारा खातीर उणी पडटाली. ताका लागून वेपारी मुखेल रस्त्याचे कुशीक स्टॉल घालून बसताले. मागीर ह्या रस्त्यार येरादारी कोयंडी जाताली. हाचो त्रास सगळ्यांक जातालो. उपरांत हे समस्येचेर उपाय म्हणून थळावे आमदार, कला आनी संस्कृती मंत्री गोविंद गावडे हांणी भोम अडकोण पंचायतीच्या सहकार्यान बरींच वर्सां सावन आडकून उरिल्लो बाजार प्रकल्प पुराय केलो. फाटल्या वर्सा ह्या प्रकल्पाचें मुख्यमंत्री डॉ. प्रमोद सावंत हांचे हस्तुकीं उक्तावण जाले उपरांत हो बाजार लोकां खातीर उपलब्ध जालो. ताका लागून वेपारी आनी नागरिकांनी मंत्री गोविंद गावडे आनी भोम अडकोण पंचायत मंडळ हांचे उपकार मानले.
तरी आयज आनी फाल्यां ह्या लागिल्ल्या बाजारांत येवपी लोकांनी आपलीं वाहनां योग्य तरेन लावन सहकार्य करचें असो उलो सरपंच दामोदर नायक हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
