पुर्तुगाल प्री-क्वॉर्टरफायनलींत

भांगरभूंय | प्रतिनिधी

संवसारीक फुटबॉल सर्त 2022तलें पुर्तुगालाचें दोळ दिपकावपी प्रदर्शन चालूच आसा. हांगाच्या लुसेल स्टेडियमाचेर जाल्ले एच गटांतले मॅचींत ताणें उरुग्वेक 2-0 अशा गोल फरकांनी हारयलो.

ह्या जैता सयत पुर्तुगालान प्री क्वॉर्टर फायनलींतली आपली सुवात निश्चीत केली., ताचे आदीं फ्रान्स आनी ब्राझील ह्या पंगडांनी लेगीत निमाण्या 16तली आपली सुवात निश्चीत केल्ली.

उरुग्वे आडच्या जैतांत पुर्तुगालाचो ब्रुनो फर्नांडीस पर्जळ्ळो. दोनूय गोल ताणें केले. मुखेली क्रिस्तियानो रोनाल्डोक एकूय गोल करपाक जमलो ना आनी ताका 82व्या मिनटाक बदली केलो.

पुर्तुगालान आतां मेरेन खेळिल्ल्यो दोनूय मॅची जिखल्यात. ताका लागून स गुणां सयत तो एच गटांत पयले सुवातेर पावला. घाना तीन गुणां सयत दुसरे सुवातेर आसा. दक्षीण कोरिया तिसरे आनी उरुग्वे चवथे सुवातेर आसा. उरुग्वेक फुडले फेरयेंत पावपाक आपले निमाणे मॅचींत घाना पंगडाक खंयचेय परिस्थितींत हारोवपाक जाय.

पुर्तुगाल आनी उरुग्वे मॅची विशीं सांगचें जालें जाल्यार पयल्या अर्दांत दोनूय पंगड गोलाविणें बादाबाद आशिल्ले. पुर्तुगालाचो एकूय शॉर्ट लक्षभेद करपाक शकलो ना. दुसऱ्या अर्दांतल्या अखेरच्या खेळांत ताणें आपलो खेळ आनी खर करून चड आक्रमणाचेर भर दिलो.

ते पयलीं म्हणल्यार पयल्या अर्दांत उरुग्वेच्या रॉड्रिगो बेंटनकूरान पुर्तुगालाच्या तीन डिफॅण्डरांक चकयत गोलपोस्टा कडेन सामको लागीं पाविल्लो. उरुग्वेक गोल करपाची बरी संद आशिल्ली. पूण, ताणें मारिल्ली कीक थेट पुर्तुगालाचो गोलकीपर दिएगो कोस्ताच्या हातांत गेली.

उत्तरार्धांत पुर्तुगालान नव्यान सुरवात केली. ताचो दुसऱ्या अर्दाच्या पयल्या 10 मिनटांनी फरक दिश्टी पडलो. ब्रुनोन 54व्या मिनटाक राफेल गुरेरोच्या उत्कृश्ट क्रॉसाचेर गोल केलो. पूण, गोल जाळांत वतना क्रिस्तियानो रोनाल्डोचो लेगीत स्पर्श जाल्ल्यान तो लेगीत गोलाचो आनंद मनोवपाक लागलो. पूण, गोल ब्रुनोच्या खात्यांत गेलो.

एका गोलान फाटीं पडल्या उपरांत उरुग्वेन आक्रमक खेळ करपाचो यत्न केलो. पूण, पुर्तुगालाचो बचाव भेदपाक ताका जमलो ना. रिव्हर्स इंज्युरी टायमांत (93वें मिनट) ब्रुनोन आपलो आनी पंगडाचो दुसरो गोल केलो. ताणें पॅनल्टीचेर हो गोल केलो. जोस जिमेनेझचो बॉक्सांत बॉलाक हात लागिल्ल्यान रॅफ्रीन पॅनल्टी दिली.