भांगरभूंय | प्रतिनिधी
फोंडें लिंगीक अत्याचार प्रकरण
पणजी: लग्नाचें हांयस दाखोवन लिंगीक अत्याचार केल्ल्या प्रकरणांत वैजकी अहवाल न्हयकारात्मक आयलो. तशेंच कागाळ दाखल करपाक कळाव कित्याक जालो हे विशींची म्हायती सादर केली ना. तेच बरोबर म्हत्वाचे पुरावे न्यायालयांत सादर करपाक अपेशी थारिल्ल्याचें निरिक्षण नोंद करून पणजेंतल्या जलदगती आनी पोक्सो न्यायालयान दुबावीत तरणाट्याची पुरावो नाशिल्ल्यान निर्दोश सुटका केली. हे विशींचो निवाडो न्या. दुर्गा मडकयकार हांणी जारी केलो.
ह्या प्रकरणांत फोंडें पुलिसांनी 11 फेब्रुवारी 2017 दिसा गुन्यांव दाखल केल्लो. ते प्रमाण पिडीत तरणाटेन कागाळ दाखल केल्ली. दुबावीत तरणाटो आनी पिडीत तरणाटी एकामेकांक वळखतालीं. ताका लागून पिडीत चली ताचे बरोबर कामाक वताली.
मजगतीं, दुबावीत तरणाट्यान 25 जानेवारी 2021 ते 1 नोव्हेंबर 2016 मजगतीं तिचे कडेन इश्टागत केली. ह्याच वेळार दुबावितान तिका लग्नाचें हांयस दाखोवन तिचेर खूबशे फावटी लिंगीक अत्याचार केल्ल्याचें म्हणिल्लें. उपरांत दुबावीत तरणाट्याच्या कुटुंबान लग्नाक न्हयकार दिल्ल्याचें सांगलें.
तशेंच तिचे कडेन लग्न करीत जाल्यार अपघातांत मरण येतलें वा तांकां भुरगीं जावचीं नात हें कारण मुखार करून लग्न करपाक न्हयकार दिल्ल्याचें कागाळींत म्हणलां. ह्या कागाळीची दखल घेवन पुलिसांनी दुबाविता आड लिंगीक अत्याचार प्रकरणांत भादंसंच्या कलम 376 खाला गुन्यांव दाखल करून अटक केली.
उपरांत न्यायालयान दुबावीत तरणाट्याक 5 मे 2018 दिसा सशर्त जामीन मंजूर केलो. ह्या प्रकरणांत पुलिसांनी तपास पुराय करून 12 मे 2018 दिसा न्यायालयांत तरणाट्या आड आरोपपत्र दाखल केलें. ह्या प्रकरणांत न्यायालयान प्रथमदर्शनी पुराव्याची दखल घेवन 24 एप्रील 2019 दिसा आरोप निश्चीत करून खटलो सुरू केलो.
ह्या प्रकरणांत न्यायालयांत सुनावणी जाली तेन्ना, न्यायालयांत सादर केल्लो वैजकी अहवाल न्हयकारात्मक आयलो. तशेंच दुबावीत तरणाट्या आड वैजकी पुरावे सादर करपाक अपेस आयलें. तशेंच सगले पंच, साक्षिदार पिडीत चलयेच्या वळखीचे आशिल्ल्याचें निरिक्षण नोंद करून न्यायालयान दुबाविताची पुरावो नाशिल्ल्यान निर्दोश सुटका केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
