भांगरभूंय | प्रतिनिधी
मुरगांव म्हाल लैंगीक अत्याचार प्रकरण
पणजी: पिडीत चलयेचे उरफाटे तपासणेंत दुबावीत लग्न करपाक तयार आशिल्लो. पूण दोगांचेंय धर्म वेगळे आशिल्ल्यान दुबाविताच्या कुटुंबाचो विरोध आशिल्लो. तशेंच दुबावीत आनी पिडिताची सरकारी यंत्रणे कडेन नोंदणी जाली. हाची दखल घेवन मेरशेच्या पॉक्सो न्यायालयान मुरगांव म्हालांतल्या दुबावीत तरणाट्यान गुंगीचें वखद दिवन आनी लग्नाचें हांयस दाखोवन लैंगीक अत्याचार केल्ल्या प्रकरणांत पुरावे नाशिल्ल्यान निर्दोश सुटका केली. हे विशींचो आदेश डॉ. पुजा कवळेंकार हांणी दिलो.
ह्या प्रकरणांत पिडीत चलयेन वास्को पुलीस स्टेशनार 18 ऑगस्ट 2016 दिसा कागाळ दाखल केली. ते प्रमाण दुबावीत तरणाट्यान ती नेण्टे पिरायेची आसतना जून 2013 वर्सा तिका कुटुंबां कडेन वळख करपाचे सांगून ताच्या घरा व्हेली. थंय ताणें तिका गुंगीचें वखद दिवन तिचेर लैंगीक अत्याचार केलो. उपरांत तिका लग्नाचें हांयस दाखोवन खूबशे फावटी तिचेर लैंगीक अत्याचार केले. तशेंच 2026 वर्सा दुबावीत आनी पिडिताची सरकारी यंत्रणे कडेन लग्नाची नोंदणी केली. तशेंच ती गुरवार जाल्ली.
त्या वेळार ताच्या कुटुंबा कडेन हे विशींची चर्चा केली तेन्ना तीं दोगांय वेगळ्या धर्माची आशिल्ल्यान कुटुंबांनी त्या दोगांच्या लग्नाक न्हयकार दिलो.
ह्याच काळांत खूबशे फवटी जून 2016 ते 17 ऑगस्ट 2016 ह्या काळांत वयलो घटनाक्रम सुरू आशिल्लो. हाची दखल घेवन वास्को पुलिसांनी गुन्यांव दाखल करून दुबाविताक अटक केली. उपरांत न्यायालयान 25 ऑगस्ट 2016 दिसा दुबाविताक सशर्त जामीन मंजूर केलो.
ह्या प्रकरणांत पुलिसांनी तपास पुराय करून 10 जून 2017 दिसा न्यायालयांत आरोपपत्र दाखल केलें. ह्या प्रकरणांत न्यायालयांत सुनावणी जाली तेन्ना, पिडीत चलयेच्या बापायची उरफाटी तपासणी केली. तातूंत तांणी दोगांच्यो लग्न नोंदणी सरकारी यंत्रणे कडेन केल्ल्याची कबुली दिली. तशेंच उपरांत ती गुरवार जातकच दुबाविताचे आवयन धर्म वेगळो आशिल्ल्यान विरोध केल्ल्याची साक्ष दिली.
ह्या प्रकरणांत पिडीत चलयेची आनी हेरांची उरफाटी तापसणी केली. हाची दखल घेवन न्यायालयान वयलें निरिक्षण नोंद करून दुबावीत तरणाट्याची पुरावो नाशिल्ल्यान निर्दोश सुटका केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
