भांगरभूंय | प्रतिनिधी
एसी डक्टाच्या कामा विशीं मंत्र्यांक कसलीच म्हायती ना
पणजी, प्रतिनिधी : पावसाक लागून कला अकादमींत जी गळटी सुरू जाल्या, ताचेर पुराय म्हायती घेतले बगर हांव उलोवचों ना. कला अकादमीच्या वांगडी सचिवाक हांवें योग्य ते आदेश दिल्यात, अशें कला आनी संस्कृती मंत्री गोविंद गावडे हांणी सांगलां. एअर कंडिशन यंत्रणेच्या कामाच्या दर्जाची म्हाका कसलीच म्हायती ना, अशें तांणी फुडें म्हणलें.
आयतारा पावसाक लागून कला अकादमीच्या दीनानाथ मंगेशकार सभाघरांतल्या पाख्यांतल्यान उदक येवपाक लागलें. हाका लागून कामाच्या दर्जा विशीं विरोधी पक्षांनी प्रस्न उप्रासतना ऑडिटाची मागणी केली. कला अकादमीच्या दुरूस्तीच्या कामा खातीर हाचे पयलीं मंत्री गोविंद गावडे हांचेर खर टिका जाल्या. हांवें कला अकादमीचे गळटीची पळोवणी करूक ना. पळोवणी करून पुराय म्हायती घेतले उपरांतूच हांव उलोवपाक शकतलों, अशें तांणी भांगरभूंय कडेन उलयतना सांगलें.
वातानुकूलीत यंत्रणेच्या (एसी डक्ट) पायपांतल्यान उदक येवपाक लागलें, अशी म्हायती बांदकाम अभियंत्यांनी दिल्ली. गोविंद गावडे हांणीय हाचेरूच बोट दवरलां. एसी डक्टाच्या कामा विशीं म्हाका कांयच खबर ना अशें तांणी सांगलेंं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
