भांगरभूंय | प्रतिनिधी
पांच वर्सांनी सांखळे मतदारसंघांत २५ हजार लिटर दूद उत्पादनाची मोख
दिवचल, प्रतिनिधी: पुराय गोंयांक दर दिसा साडेचार लाख लिटर दुदाची गरज आसता. मात गोंयांत फक्त ६० हजार लिटरूच दूद उत्पादन जाता. येवपी काळांत डेअरी फार्मांत दुदाचें उत्पादन वाडोवपा खातीर कुडणेंच्या गोमांचल डेअरीन संकल्प केला. पांच वर्सांनी सांखळे मतदारसंघांत २५ हजार लिटर दूद उत्पादनाची मोख दवरल्या, अशी म्हायती मुख्यमंत्री डॉ. प्रमोद सावंत हांणी सांखळे दिली.
कुडणेंची गोमांचल डेअरी आनी हेर शेतकरी आनी दूद उत्पादकांची एक बसका सांखळेच्या रवींद्र भवनांत जाली. हे बसकेक डॉ. सावंत हांचे सयत सुभाष मळीक, सल्लागार म्हणून नेमिल्ले बालाजी रेड्डी आनी हेर हाजीर आशिल्ले.
गोमांचल डेअरी कडेन संबंदीत दूध उत्पादकांक ह्या उत्पादनांत मार्गदर्शन आनी सगळे तरेचें सहकार्य, मजत मेळचे खातीर बंगळुरूच्या बालाजी रेड्डी हांची हे डेअरीचे सल्लागार म्हणून नेमणूक जाली. ह्या सल्लागाराचो लाव गोमांचल डेअरी कडेन जुळिल्ल्या दूध उत्पादकां वांगडा हेर दूध उत्पादन शेतकारांनी घेवचो. येवपी काळांत दूद उत्पादनांत सांखळे मतदारसंघाचें नांव वयर हाडपा खातीर ह्या सल्लागाराचो लाव शेतकारांक जातलो. ताका लागून शेतकारांनी ह्या डेअरी कडेन जु़ळचें, असो उलो मुख्यमंत्र्यान मारलो.
दूद उत्पादक शेतकारांचें उत्पादन वाडोवन अर्थीक नदरेन घटमूट करपाक तशेंच ह्या मळा वेल्या शेतकारांक योग्य मार्गदर्शन दितले. गायो विकत घेवप, गायींक वैजकी उपचार, खाण हे विशींय सांगतले. तांत्रिक नदरेन ह्या मळार उदरगत जावपाक ह्या सल्लागारा कडेन पंगड आसा. त्या पंगडां वरवीं योग्य मार्गदर्शन आनी सगळे तरेची मजत शेतकारांक करतले, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
