भांगरभूंय | प्रतिनिधी
म्हापशें, प्रतिनिधी ः खोर्ली, म्हापश्यां घरांतले आल्मारींत आवयन दवरिल्ली ४ लाख रूपया रक्कम चोरिल्ल्या प्रकरणांत दुबावीत प्रियेश पुंडलिक वायंगणकार (३९) हाका अटक केली.
हे विशीं प्रिया पुंडलिक वायंगणकार हांणी पुलिशेंत कागाळ केल्ली. ही चोरयेची घडणूक शुक्रार २५ ऑक्टोबराक दनपरां ११.४५ ते १२.३० ह्या वेळार घडिल्ली. कागाळदारांनी आपल्या घामा कश्टांची ४ लाख रूपया रक्कम घरांतले आल्मारींत दवरिल्ली. ही रक्कम वयल्या काळांत दुबावीत प्रियेश ह्या तांच्या पुतान काडली. आल्यारींत पयशे नाशिल्ल्याचें पळोवन कागाळदारान आपल्या पुताक हे विशीं विचारलें. उपरांत कागाळदारांनी सोमारा पुलिशेंत वचून कागाळ केली. हे कागाळीच्या आदाराचेर पुलिसांनी दुबाविताक अटक केली.
पुलिसांनी चोरयेचे रकमेंतल्यान दुबाविता कडल्यान ७० हजार रूपया जप्त केले. पुलिसांनी दुबाविता आड भा.न्या.सं.च्या ३०५ कलमां खाला चोरयेचो गुन्यांव नोंद केलो.
दुबाविताक म्हापश्या न्यायालयान ६ दीस पुलीस बंदखणींत दवरपाचो आदेश दिलो. फुडलो तपास पुलीस निरीक्षक निखिल पालेकार हांच्या मार्गदर्शना खाला उपनिरीक्षक दत्तप्रसाद पंडित करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
