भांगरभूंय | प्रतिनिधी
घडणूक थळार पुलीस बंदोबस्त; आठ दिसांत कागदपत्रां सादर करपाची सुचोवणी
मडगांव: सां जुझे दी आरियाल पंचायतीच्या बेनाभाट वाठारांत खाजगी सुवातेंत छत्रपती शिवाजी महाराजांच्या पुतळ्याची उबारणी केल्या. ह्या पुतळ्याचे उबारणी खातीर सिमेंटाच्या बुन्यादी बांदकामा खातीर सुवात धनयान पंचायती कडेन परवानगी मागिल्ली. ते प्रमाण पंचायतीन पळोवणी करून आठ दिसांत जमनी विशीं आनी परवानगी विशीं गरजेचीं तीं कागदपत्रां सादर करपाची सुचोवणी केल्या.
सां जुझे दी आरियाल पंचायत वाठारांत खाजगी सुवातेंत छत्रपती शिवाजी महाराजांचो घोड्यार बशिल्ल्या पुतळ्याची उबारणी शिवजयंती दिसा केली. ही उबारणी बेकायदो आशिल्ल्याचें सांगून ग्रामस्थांनी आंदोलनूय केलें. उपरांत ग्रामसभेंतूय ग्रामस्थांचेर गुन्यांव नोंद करपी पुलिसांनी गांवां भायल्यान येवन जमाव केल्ल्या आनी शांतताय इबाडिल्ल्याच्या कारणां वेल्यान गुन्यांव नोंद करपाची मागणी केल्ली.
सुवात धनी आनंद तांडेल हांणी सांगलें, ही सुवात खाजगी आसून सुवात धनया कडल्यान पुतळो उबारपा खातीर हरकत ना दाखलो घेतला. हाचे पयलीं 9 फेब्रुवारी दिसा ग्रामपंचायतींत सिमेंटाची बुन्याद घालपाची परवानगी मेळची हे खातीर अर्ज सादर केल्लो. पंचायत मंडळाची 15 फेब्रुवारीक बसका जाली आनी त्या वेळर पळोवणी केली तेन्ना निर्णय घेवपाचें थारायिल्लें. मदेकांत पुतळ्याच्या उबारणी वेल्यान गोंदळ निर्माण जालो. आतां पंचायती कडल्यान सोमारा सकाळीं पुतळ्या खातीर बुन्याद घालपा खातीरचो अर्ज केल्लो. ते प्रमाण पळोवणी केली. ह्या वेळार कायदो सुवेवस्थेचो प्रस्न निर्माण जावचो न्हय म्हूण पुलीस बंदोबस्त दवरिल्लो.
ह्या वेळार तांडेल हांणी खाजगी सुवात आशिल्ल्यान पुतळो उबारपा खातीर पंचायत वा हेर खंयच्याय परवानगीची गरज नाशिल्ल्याचें स्पश्ट केलें. सचिवां सयत आठ वांगड्यां कडल्यान पुतळो वाठाराची पळोवणी केली. पंचायत वांगड्यांनी मुखेल रस्त्या सावन पुतळो बसयिल्ले सुवाते मेरेन सुवातेचे तीन सर्वे क्रमांक आसून आठ दिसांत पंचायती कडेन गरजेचीं तीं कागदपत्रां सादर करपाची सुचोवणी केल्या. पंचायत वांगड्यांनी केल्ले पळोवणे उपरांत पळोवणीचो अहवाल पंचायतीक सादर करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
