भांगरभूंय | प्रतिनिधी
पणजी: आसगांव आगरवाडेकार कुटूंब रावत आशिल्ल्या घराचो भाग मातयेभरवण केलो. ह्या प्रकरणांतली मुखेल दुबावीत पुजा शर्मान मुंबय उच्च न्यायालयाच्या गोंय खंडपिठांत दाखल केल्ल्या अटकपूर्व जामीन अर्जा वेली सुनावणी पुराय जाल्या. ह्या प्रकरणाचो निवाडो न्यायालयान राखून दवरला.
आसगांवां आगरवाडेकार रावत आशिल्ल्या घराचो भाग 22 जून दिसा मोडिल्लो. आगरवाडेकार कुटुंबांतल्या दोगांचें अपहरणूय केल्लें. ह्या प्रकरणांत पुजा शर्मा आड प्रिंशा आगरवाडेकार हांणी कागाळ दाखल केल्ली. हणजूण पुलिसांनी पुजा शर्मा सयत हेरां आड गुन्यांव नोंद केल्लो. पुलिसांनी 25 जून दिसा पुजा शर्माक चवकशेक हजर रावपा खातीर नोटीस दिल्ली. उपरांत हें प्रकरण गुन्यांव फांट्या कडेन वर्ग जालें.
ह्या प्रकरणाचे चवकशे खातीर एसआयटीची स्थापणूक जाली. उपरांत चवकशे खातीर दोन फावटी नोटीस दिली. पूण हजर रावनासतना पुजान पणजेंतल्या उत्तर गोंय जिल्हो आनी सत्र त्यायालयांत अटकपूर्व जामीन अर्ज दाखल केलो. तो न्यायालयान भायरायलो.
शर्मान गोंय खंडपिठांत वयल्या आदेशाक आव्हान दिलें. हे विशीं बिरेस्तारा उच्च न्यायालयांत सुनावणी जाली तेन्ना पुजा शर्माचो वकील सुरेंद्र देसाय हांणी बाजू मांडून आपल्या अशिलाचें घर मातयेभरवण करपाक कसलोच वांटो ना. हातूंत शर्माक गरजे भायर गुथयला. तशेंच कागाळदारान आपले आड कागाळ फाटीं घेतल्या. तशेंच मुखेल सुत्रधार अर्शद ख्वाजान न्यायदंडाधिकाऱ्या कडेन दिल्ले जबानींत ताणेंच वयलें कृत्य केल्ल्याचें मान्य केल्ल्याचो युक्तिवाद मांडलो.
ह्या वेळार एसआयटी वतीन भारताचे डेप्युटी सॉलिसिटर प्रवीण फळदेसाय हांणी बाजू मांडून पुजा शर्मा चवकशेक सामकार येवचे बदला विवीध कारणां मुखार करून टाळाटाळ करता. तशेंच तिणें न्यायालयांत धांव घेवन अटकपूर्व जामीन अर्ज दाखल केला. तिका मालमत्ता खरेदी करपा वेळार थंय आगरवाडेकार कुटूंब रावत आशिल्ल्याचें खबर आशिल्लें. तशेंच हे विशीं तिणें एसआयटी कडेन 22 मार्च 2024 दिसा कागाळ दाखल केल्ली. कागाळीचेर कारवाय जायत नासल्यार तिका न्यायालयांत वचपाची मेकळीक आशिल्ली. अशें आसून लेगीत आगवाडेकार रावत आशिल्ल्या घराचो भाग मातयेभरवण केलो. ताका लागून सगल्या घणुकेच्या संदर्भांत तशेंच पुजा शार्माचे भुमिकेची चवकशी करप गरजेची आशिल्ल्याचो युक्तिवाद मांडलो.
ह्याच वेळार एसआयटीन तिची कोठी गरजेची आसा वा ना हें केन्नाच स्पश्ट केल्लें ना. पूण तिणें दाखल केल्लो अटकपूर्व जामीन भायरावपाची मागणी केल्ल्याचो युक्तिवाद फळदेसाय हांणी केलो.
मजगतीं, न्यायालयान दोनूय पक्षाची बाजू आयकून घेतले उपरांत निवाडो राखून दवरला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
