भांगरभूंय | प्रतिनिधी
अयोध्या, खबरां संस्था : अयोध्येच्या रामाच्या देवळा संबंदी जायते निर्णय घेतल्यात. १ जुलय सावन राममंदिरांत नवी वेवस्था चालीक लायल्या. पुजार्यांचेरूय खूब निर्बंध घाल्यात. श्री राम जन्मभूमी तीर्थक्षेत्र ट्रस्टान हो निर्णय घेतला. तशेंच आतां रामलल्लाच्या पुजार्यां खातीर खाशेली भेसाची पद्दत दवरल्या. आतां हो ड्रेस कोड आसत जाल्यारूच देवळांत प्रवेश मेळटलो.
१ जुलय सावन राम देवळांतल्या पुजार्यांचे संख्येत वाड केल्या. रामलल्लाचे पुजे खातीर २६ पुजारी वेगवेगळ्या शिफ्टीनी सेवा दितले. श्रीराम जन्मभूमी तीर्थक्षेत्र ट्रस्टान स्थापन केल्ले धर्मीक समितीन २१ नवे प्रशिक्षीत पुजार्यांचो पुजेचे वेवस्थेंत आस्पाव करपाचो निर्णय घेतला. हे खातीर ट्रस्टान पुजार्यां खातीर वळखपत्रूय जारी केलां. रोखडेंच ह्या पुजार्यांक ६ म्हयन्यां खातीर प्रशिक्षण प्रमाणपत्रा वांगडा नेमणूक पत्र दितले.
राम मंदिर प्रशिक्षणाच्या आदीं ११ प्रशिक्षीतांक रामलल्लाचे पुजेंत वांटेकार करून घेतिल्ले. रामनमीच्या काळांत रामलल्लाची पुजा करपा खातीर ११ पुजारी नेमिल्ले. जातूंत दर दिसा सकाळीं रामलल्लाची मंगला आरती, श्रीगण आरती आनी शयन आरती ते रामरक्षा स्त्रोत्र आनी पुरुस्त्रोत्र हे १६ मंत्रांचो जप करतात.
रामलल्लाक ५६ पदार्थांचो खाशेलो भोग
आषाढी कृष्ण एकादशीच्या निमतान सोमारा रामलल्लाला विशेश श्रृंगारा वांगडा पुराय देवळाचो वाठार फुलांनी सजयल्लो. रामलल्लाचे विधीपुजे उपरांत दनपरां ५६ तरेचे पदार्थ अर्पण केल्ले. ते उपरांत भक्तांक प्रसाद वांटलो. कर्नाटकांतल्या जगद्गुरु स्वामी सुकेन्दाचार्य हांच्या भक्तांनी रामलल्लाच्या दरबारांत हो उत्सव आयोजीत केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
